गुल्मीकी एक वृद्धाले ९१ वर्षमा नागरिकता लिइन्
प्रकाशित मिति : बैशाख २३, २०७५ आईतबार
दुर्गम गाउँको कुरा होईन गुल्मी सदरमुकाम तम्घाससंग जोडिएको गाउँकी एक बृद्धले ९१ वर्षको उमेरमा पहिलो पटक सदरमुकामा पाईला टेकेकी छन । त्यो पनि नागरिकता बनाउनका लागि उनी सदरमुकाम तम्घास पहिलो पटक पुगेकी हुन् ।
मुसीकोट नगरपालिका वडा नम्वर ४ , साविकको वडागाउँ गाविस वडा नम्वर १ तल्लो दजाकोटकी ९१वर्षीया बृद्धा चन्द्रदेवी पुनले डाँडाको घाम बन्दै गर्दा नागरिकता बनाएकी छिन् । पुनको जन्म विक्रम सम्वत १९८४ । ०२ । १ गते रहेको छ । उक्त मितिमा जन्मेकी पुनले आईतवार जिल्ला प्रशासन कार्यालय गुल्मीबाट पहिलो पटक नागरिकता लिएकी हुन् ।
नागरिकता नभए पनि तत्कालीन बडागाउँ गाविसले उनलाई बृद्ध भत्ता खुवाउँदै आएको तर अहिले मुसिकोट नगरपालिकाले नागरिकता विना बृद्ध भत्ता रोक्का गरेपछि उनले अहिले आएर नागरिकता बनाएकी हुन् ।
जीवनमा कहिले पनि विरामी नभएको कारण आफु कहिल्यै पनि सदरमुकाम आउन नपरेको वृद्धा चन्द्रदेवी पुनको भनाई छ ।
गुल्मीका प्रमुख जिल्ला अधिकारी कौशलराज शर्माले यस अघि ८० वर्ष सम्मकोलाई आफुहरुले नागरिकता दिए पनि पहिलो पटक दिएको यति वढि उमेरका व्यक्तिलाई नागरिकता दिन पाउँदा खुसी लागेको बताउनु भयो ।
दुई वर्ष अघि दजाकोटमा भीषण आगलागी हुँदा बृद्धा पुनसहितका ६० भन्दा बढि घर गोठ जलेर नष्ट भएको थियो । त्यसपछि उनी डाँडाथोकस्थित छोरी वगालेको घरमा बस्दै आएकी छन् । उनिहरुको ध्वस्त घर अझै बन्न सकेको छैन् ।