यी हुन् अष्ट्रेलियाको सिटीजनसीप लिन आवश्यक योग्यता,कागजात र प्रक्रिया
प्रकाशित मिति : कार्तिक २५, २०७५ आईतबार
अष्ट्रेलिया अहिले विश्वका धेरै मुलुकका नागरिकहरुको सपनाको देश बनिसकेको छ । त्यसैले यहाँ विभिन्न भिसामा आउने विदेशीहरुको संख्या वर्षेनी बढ्दो छ ।
अष्ट्रेलियाले पनि विभिन्न प्रकारका भिसाहरु उपलब्ध गराएर अष्ट्रेलियामा आउन चाहनेहरुका लागि बाटो सहज बनाइदिएको छ । भनिन्छ अपराध गर्ने उदेश्य बाहेक अरु जुनसुकै काममा आउन चाहनेका लागि अष्ट्रेलियाको भिसा खुल्ला अर्थात खुकुलो छ । त्यति मात्र होइन अष्ट्रेलियामा स्थायी बसोबासको अनुमति अर्थात पीआर लिन पनि तुलनात्मक रुपमा सहज व्यवस्था छ । कानूनी प्रक्रिया र मापदण्ड सबै पूरा गर्नेले कुनै झण्झट विना सजिलै पीआर पाउँछन् । अझ त्यो भन्दा पनि ठूलो कुरा अष्ट्रेलियामा दोहोरो नागरिकताको व्यवस्था समेत छ । अर्थात अष्ट्रेलियाको नागरिकता पाउन आफ्नो देशको नागरिकता त्याग्नै पर्छ भन्ने छैन । सम्बन्धित देशमा दोहोरो नागरिकताको व्यवस्था छ भने अष्ट्रेलियाले त्यो देशको नागरिकता त्याग्न बाध्य बनाउँदैन । तर यसका लागि केही कानूनी प्रक्रियाहरु भने पूरा गर्नुपर्छ ।
कसरी लिने अष्ट्रेलियाको नागरिकता ?
अष्ट्रेलियन नागरिकताका लागि आवेदन दिएपछि पनि तुरुन्तै पाइदैन । यसका लागि कम्तिमा दुई वर्ष कुर्नुपर्छ । यसबीचमा अष्ट्रेलिया भन्दा बाहिर रहेपनि अष्ट्रेलियासँग आफ्नो आधिकारिक सम्बन्ध जोडिएको देखाउनुपर्छ । अष्ट्रेलियन नागरिकहरु कानूनी रुपमा कमनवेल्थ राष्ट्रका समेत नागरिक हुने गर्छन् । त्यसैले वेलायतमा पनि अष्ट्रेलिन नागरिकहरुलाई नागरिक सरह सबै अधिकार र सुविधा प्राप्त हुन्छन् ।
अष्ट्रेलियाको नागरिकता लिन कम्तिमा ४ वर्ष अष्ट्रेलियामा बसेको हुनुपर्छ । यस्तै पीआर पाएको १२ महिना कुर्नुपर्छ । यसबीचमा तपाईको चरित्रका बारेमा अष्ट्रेलिया सरकारले तपाईलाई थाहै नदिई अध्ययन र अनुसन्धान गर्दछ । जस्तो तपाईसँग सम्बन्धित व्यक्तिहरुसँग सम्पर्क गरेर विवरण माग्ने,तपाईको फेसबुक,ट्वीटर लगायकता सामाजिक सञ्जालहरु क्रस चेक गर्ने आदि । त्यसैले यसबीचमा तपाईको चरित्र विल्कुल ठीक छ भन्ने भरोसा दिलाउन सक्नुपर्छ ।
आवश्यक कागजातहरु
परिचय खुल्ने कागजातहरु :
जस्तै फोटो,हस्ताक्षर,हाल बसिरहेको ठेगाना,न्वारानको नाम,जन्म मिति आदि खुल्ने कागजातहरु ।
राम्रो चरित्र भएको कागजात :
जस्तो कुनै गैरकानूनी काममा संलग्न नभएको प्रहरीबाट प्रमाणित कागजात ।
यसदेखि बाहेक अरु सपोर्टिङ कागजातहरु पनि पेश गरे राम्रो । यदि ती कागजातहरु अँग्रेजी भन्दा भिन्न भाषामा छन् भने अँग्रेजीमा अनुवाद गरि प्रमाणित गरिएको हुनुपर्छ ।
यसरी कागजातहरु तयार भएपछि अनलाइन अथवा कागजी दुवै प्रक्रियाबाट आवेदन दिन सकिन्छ । यसका लागि २८५ अष्ट्रेलियन डलर आवेदन शुल्क बुझाउनुपर्छ ।
तपाईको आवेदन स्वीकृत भएपछि तपाईलाई केही परीक्षाका लागि एप्वाइन्टमेन्ट पाउनुहुन्छ । त्यस्तो परीक्षा लिखित अथवा मौखिक वा दुवै पनि हुन सक्छ । त्यसरी परीक्षा दिन जाँदा आफूले बुझाएका सबै कागजातहरुको सक्कल प्रति साथै लिएर जान नभुल्नुहोला । तर १८ वर्ष मूनिका वा ६० वर्ष भन्दा माथिकाहरुले भने कुनै परीक्षा दिनु पर्दैन ।
तपाईको नागरिकताका लागि दिइएको आवेदन स्वीकृत भएमा तपाईले सम्बन्धित राज्यको कार्यालयमा गएर शपथ लिनुपर्ने हुन्छ । यसका लागि छुट्टै कार्यक्रम राखिन्छ । स्वीकृत भएको ६ महिनाभित्र शपथ लिइसक्नुपर्छ । विशेष गरे स्थानीय काउन्सिलको कार्यालयमा यस्तो समारोहको आयोजना गरिन्छ । शपथ लिइसकेपछि तपाईले त्यही स्थानबाट अष्ट्रेलियाको नागरिकता लिन सक्नुहुन्छ ।
-हिमालयन कङ्गारु