जापानका रेल स्टेशनमा अब रोबोट हुनेछ ‘सेक्युरिटि गार्ड’
प्रकाशित मिति : कार्तिक ९, २०७५ शुक्रबार
जापानको रेलवे स्टेशनमा सेक्युरिटि गार्डका रुपमा सेवा दिने रोबोट निर्माण गरिएको छ । सन् २०२० मा आयोजना गरिने टोकियो ओलम्पिक्स र प्यारालिम्पिक्सका लागि सुरक्षा तिव्र पार्ने उद्धेश्यसहित बिकास गरिएको सो रोबोटलाई विहिवार एक पत्रकार सम्मेलन गर्दै सार्वजनिक गरिएको हो ।
कृत्रिम बौद्धिकता (आर्टिफिसियल इन्टेलिजेन्स) ले चल्ने र सेक्युरिटि क्यामरा जडान गरिएको सो रोबोटले स्टेशनमा उपस्थित शंकास्पद व्यक्ति वा वस्तुको सजिलै पहिचान गर्न सक्ने बताइएको छ । साथै यसले कर्मचारीको बोझ पनि केही कम गर्न सहयोग गर्ने बताइएको छ ।
पेरस्यूबोट नाम दिइएको सो रोबोटको उचाइ १ सय ६७ दशमलव ५ सेण्टिमिटर रहेको छ भने लम्बाई र चौडाई क्रमशः ६१ सेण्टिमिटर र ९० दशमलव ५ सेण्टिमिटर रहेको छ । आगामी नोभेम्बर २६ देखि ३० सम्म सो रोबोटलाई परिक्षणका लागि टोकियोको सेइबु सिन्जुकु स्टेशनमा राखिने यस मामिलासँग जानकार स्रोतले बताएको हो ।
रोबोटले बाधा अड्चन हटाउँदै कामका समयमा ब्रेल टाइलमाथि ओहोरदोहोर गर्न सक्छ । साथै यदि केही शंकास्पद गतिविधि भएको पाइएमा सुरक्षा अधिकारीहरुलाई सन्देश पनि पठाउन सक्ने बताइएको छ ।
टोकियो मेट्रोपोलिटन इण्डष्ट्रियल टेक्नोलोजी रिसर्च इन्सटिच्यूट, सेइबु रेलवे कर्पोरशेन, सूचना प्रविधि कम्पनी निहोन युनिस लिमिटेड र एआई क्यामरा डेभलोपर कम्पनी अर्थ आइजले संयुक्त रुपमा यसको निर्माण गरेका हुन् ।
