Follow @khasokhasmag

जापानमा कामदारहरुलाई बैंक खाता नचाहिने, स्मार्टफोनमै तलव बुझ्ने व्यवस्था सुरु गर्ने तयारी


प्रकाशित मिति : कार्तिक ९, २०७५ शुक्रबार

जापानले स्मार्टफोनको माध्यमबाट कर्मचारीलाई तलव दिने व्यवस्था ल्याउने तयारी गरिरहेको छ । बैंक खाता नभएका विदेशी कामदारले सजिलै तलव पाउन सकुन् भन्ने उद्धेश्यले यहाँका व्यवसायहरुले स्मार्टफोन वा पेरोल कार्डको माध्यमबाट इलेक्ट्रोनिक पैसामा तलव दिने योजना बनाएको निक्केई सिनबुनले आफ्नो अनलाइन संस्करणमा लेखेको छ ।

अर्को वर्षसम्म यो व्यवस्था कार्यान्वयनमा आउने गरी स्वास्थ्य श्रम तथा कल्याणकारी मन्त्रालयले यसमा काम गरिरहेको बताइएको छ । यससँगै जापान पनि नगदरहित आजको युगमा एक कदम अगाडि बढ्ने विश्लेषण गरिएको छ ।

जापानको सन् १९४७ मा बनेको श्रम कानूनमा भने श्रमिकको तलव सिधै नगदमै भुक्तानी गर्नुपर्ने व्यवस्था छ । केही पछि यसलाई संसोधन गर्दै बैंक खातामा तलव जम्मा हुने व्यवस्था ल्याइएको थियो । नयाँ परिवर्तनसँगै कर्मचारीले आफ्नो तलव स्मार्टफोन एप्लिकेशन वा अन्य कुनै विद्युतिय माध्यमबाट समेत पाउन सक्नेछन् । यसो गर्दा बैंक खाता नभएकाहरुले पनि सजिलै तलव लिन पाउने छन् ।

जापानमा नगदरहित सेटलमेण्ट २० प्रतिशत मात्रै छ । जबकी पश्चिम राष्ट्रमा यो ४० देखि ५० प्रतिशतको हाराहरीमा रहेको छ । डिजिट नगदमा हुने तलव भुक्तानीले वित्तीय प्रविधिमा नवप्रवर्तनलाई बढावा दिने अनुमान गरिएको छ । यसले विदेशी कर्मचारीलाई दिनुपर्ने क्षतिपूर्तीको प्रकृयालाई पनि तिव्र र सजिलो पार्छ । बैंक खाता हुनेहरुले कागजी काममा धेरै झन्झट बेहोर्नु पर्छ । आफ्नो तलव कसरी बुझ्ने भन्ने कुरामा चाहिँ कर्मचारीलाई छूटको व्यवस्था गरिएको छ । यस्तो सेवा दिने कम्पनी वित्तीय सेवा संस्थामा फण्ड ट्रान्सफर सेवा प्रदायकका रुपमा दर्ता हुनुपर्छ ।

अहिले विश्व नगदरहित व्यवस्थातर्फ अघि बढीरहेको अवस्थामा जापान भने नगद भुक्तानीमै अड्किएर बसिरहेको छ । श्रमिक अभावका कारण जापानमा विदेशी कामदारको माग बढीरहेको यो अवस्थामा विदेशी कामदारमैत्री नियमहरु विस्तारै आउँदै गरेको देख्न सकिन्छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com