अल कायदाको कब्जामा परेका जापानी पत्रकार मुक्त
प्रकाशित मिति : कार्तिक ८, २०७५ बिहीबार
तीन वर्षअघि सिरियामा शशस्त्र समूहको कब्जामा परेका जापानी पत्रकार जुम्पेई यासुदा मुक्त भएको र हाल उनी टर्कीमा रहेको जापान सरकारले पुष्टि गरेको छ ।
मंगलवार अबेर एक पत्रकार सम्मेलन गर्दै जापानी संसदका प्रमुख सचिव योशिहिदे सुगाले एक पत्रकार मुक्त भएको र मुक्त भएका व्यक्ति उनै पत्रकार भएको पक्का नभएपनि पक्राउ परेका जापानी पत्रकार नै हुने सम्भावना बढी रहेको र यसकारे यासुदाका पत्नीलाई पनि जानकारी गराइसकिएको बताएका थिए ।
बुधवार विदेशमन्त्री तारो कोनोले उनको रिहाइको पुष्टि गरेका हुन् । उनको स्वास्थ्य अवस्था पनि राम्रो रहेको कोनोले बताए ।
प्रधानमन्त्री शिन्जो आबेले पत्रकार यासुदाको रिहाईको पुष्टि गर्दै उनको रिहाईमा सहयोग गरेका देशहरु कतार र टर्कीलाई धन्यवाद व्यक्त गरेका छन् ।
सिरियाली युद्धबारे रिपोर्टिंग गर्ने क्रममा यासुदा सन् २०१५ मा सिरियाली शहर इड्लिबबाट सम्पर्कबिहिन बनेका थिए । उनी अल कायदा सम्बद्ध जाबात फतेह अल सामको कब्जामा परेका र समूहले १ करोड डलर फिरौतीको माग गरेका थिए । सो रकम तिरेपछि उनी स्वतन्त्र भएको हुन सक्ने अनुमान गरिएको भएपनि बुधवार नै एक छुट्टै पत्रकार सम्मेलनमा जापानी संसदका प्रमुख सचिव योशिहिदे सुगाले कुनैपनि फिरौती रकम नतिरिएको जानकारी गराए । उनले कतार र टर्की सरकारको पहलमा यासुदा छुटेको स्पष्ट पारे ।
हाल ४४ बर्षका यासुदा सन् २००४ मा पनि इराकी शशस्त्र समूहको कब्जामा परेका थिए । तर त्यो बेलामा उनलाई समूहले कुनै हानी नगरिकन अपहरण गरेको तीनदिन पछि मुक्त गरिदिएको थियो । उनी साइतामा प्रिफेक्चरका स्थायी वासिन्दा हुन् भने पत्रकारिता करियर स् १९९७ मा नागानो प्रिफेक्चरबाट प्रकाशित हुने स्थानीय पत्रिका शिनानो माइनिची सिन्बुनबाट सुरु गरेका थिए । उनले सन् २००३ देखि स्वतन्त्र पत्रकारिता सुरु गरेका हुन् ।
एक भिडियो सन्देशमा उनले आँफु हाल टर्कीमा रहेको र सुरक्षित रहेको बताएका छन् ।
सन २०१५ मा आतंकवादी समुह स्लामिक स्टेटले २ जापानी नागरिकहरु केइन्जी गोतो र हारुमा युकावाको हत्या गरेको थिए ।