श्रीमानको मृत्यु भएको केही घण्टाभित्र श्रीमतीको मृत्यु, तीनसयले छोडे होटल
प्रकाशित मिति : भाद्र १०, २०७५ आईतबार
इजिप्टको पाँच तारे होटलमा एक जोडीको केही घण्टाको अन्तरालमा अचानक मृत्यु भएको छ ।
जोन र सुसन कुपरको मृत्युपछि थोमस कुक होलिडे ट्राभल कम्पनीले रेड सी रिसोर्टमा रहेका तीन सय एक आगन्तुकलाई उक्त होटल तत्काल छाड्न आग्रह गरेको छ । ती आगन्तुकमध्ये कोही बिरामीसमेत पर्न थालेपछि सबैजनालाई बाहिर निकाल्ने निर्णय गरिएको थोमस कुकले बताएको छ ।
ल्याङ्क्यासायरको बर्नलेका ती जोडी आफ्नी छोरी केली ओर्मेरोड र तीन नातीनातिनासहित बिदा मनाउन उक्त रिसोर्ट पुगेका थिए ।
केली ओर्मेरोडले आफ्ना आमाबुवाको स्वास्थ्यमा केही खराबी नभएको र घटनाले आफूहरुलाई अत्यधिक आघात पुर्याएको बताएकी छिन् । आफू अब पोस्टमोर्टम रिपोर्टको प्रतिक्षा गरिरहेको उनले बताएकी छिन् ।
जोन र सुसनको मृत्युको कारणबारे अनुसन्धान चलिरहेका बेला ओर्मेरोडे स्थानीय अधिकारीलाई होटलको बिग्रिएको एयर कन्डिशनरका कारण आमाबुवाको मृत्यु भएको हुनसक्ने आशंका व्यक्त गरेकी छिन् ।
स्थानीय अधिकारीले जोन र सुसनको प्राकृतिक मृत्यु भएको ठहर गरेका छन् । अहमद अब्दुल्लाह, रेड सी प्रान्तका गर्भनरले ६९ वर्षे जोन र उनकी ६४ वर्षकी श्रीमतीको प्राकृतिक मृत्यु भएको बताएका छन् ।
‘जोनको होटलमा नै मृत्यु भएको हो । त्यसको तीन घण्टापछि सुसन कुपर अचेत भएपछि उनलाई अस्पताल पुर्याइएको थियो जहाँ उनको मृत्यु भएका हो,’ उनले भने ।
केलीले स्काईन्यूजलाई घटनामा केही गड्बडी भएको बताएकी छिन् । ‘होटलको रुममा केही न केही भएको हुनुपर्छ जसका कारण आमाबुवाको मृत्यु भयो,’ उनले भनिन् ।
‘उहाँहरुको अवस्था सामान्य थियो, पेट दुखेको थिएन, बान्ता भएको थिएन र कुनै स्वास्थ्य समस्या थिएन । सुत्न जानुअघि सम्म उहाँहरु दुबै साधारण अवस्थामा हुनुहुन्थ्यो,’ उनले भनिन् ।
‘म करिब ११ बजेतिर उहाँहरुको रुममा गएँ । आफूहरु निकै बिरामी भएकाले सहयोग चाहिएको बताउनुभयो । मैले उहाँहरुलाई आफ्नै अगाडि मृत्युवरण गरेको देखें । मृत्यु हुँदा दुबैको स्थिती, लक्षण एउटै थियो ।’
‘मलाई विश्वास छ केही न केही गडबडी छ । कोठामा केही न केही भएकै हुनुपर्छ ।’