गुगल क्रोम इन्कग्निटोमा पोर्न हेर्नेहरुका लागि…
प्रकाशित मिति : भाद्र ८, २०७५ शुक्रबार
बहुराष्ट्रिय कम्पनीले डेटा स्टोरेज र डेटा लिक गरेको खबरले निकै बजार ततायो । फेसबुकसहित अन्य ठूला कम्पनीमाथि यस्तो प्रकारको आरोप लागेको थियो । यो सिलसिला रोकिने तयारीमा थियो तर यसबारे अर्को खबर सार्वजनिक भयो । यसपटक यस्तो मुद्दामा मुछिएको छ – गुगल । अमेरिकाको टेनेसीको नेशविल शहरस्थित वेन्डरबिल्ट युनिभर्सिटीको दाबी अनुसार गुगलले आफ्ना प्रयोगकर्ताको डेटा जम्मा गर्छ । इन्कग्निटो मोडका प्रयोगकर्ताको समेत ।
के हो इन्कग्निटो मोड ?
इन्कग्निटोलाई प्राइभेट ब्राउजिंग पनि भनिन्छ । यो मोडमा तपाईं जे पनि इन्टरनेटमा सर्च गर्नुहुन्छ, त्यो सेभ हुँदैन । यस्तै दाबी गर्ने गरिन्छ । थुप्रै पटक तपाईंले देख्नुभएको होला कि तपाईंको जानकारी अटोफिल अर्थात् आफैं भरिन्छ । यो अटोफिल जानकारी तपाईंको ब्राउजरले सेभ गर्ने गर्छ । तर इन्कग्निटो मोडमा तपाईंको कुनै पनि जानकारी सेभ हुँदैन । जब तपाईं आफ्नो ब्राउजरबाट बाहिर निस्कनुहुन्छ तब सबै जानकारी आफसेआफ डिलिट हुन्छन् । तपाईं जुन वेबसाइटमा जानुहुन्छ त्यसको कुनै पनि फोटो, भिडियो, कुकिज केही पनि सेभ हुँदैनन् ।
अब जुन अनुसन्धान सार्वजनिक भएको छ, त्यसअनुसार यो मोड पूर्ण रुपमा सेफ छैन । यो अनुसन्धान अनुसार जब तपाईं कुनै अकाउन्टबाट गुगलमा लगइन गर्नुहुन्छ र केही समयसम्म इन्कग्निटो मोड प्रयोग गरेपश्चात् आफ्नो वास्तविक अकाउन्टमा फर्किएपछि तपाईंको व्यवहारको प्याटर्नको आधारमा तपाईंको पहिचान गरिन्छ । त्यसपछि त्यसलाई तपाईंको अकाउन्टबाट जोडेर हेर्न सकिन्छ । गुगलले चाहेको खण्डमा तपाईंको पहिचान पत्ता लगाउन सक्छ । पोर्न हेर्नका लागि यो मोडको प्रयोग गर्नेहरुका लागि पनि यो असुरक्षित छैन ।
अर्को कुरा इन्कग्निटो मोडमा तपाईं जति नै प्राइभेट हुनुहोस्, तपाईंको आइपी एड्रेस सधैं नै ट्रेस गर्न सकिन्छ । यो खबर सार्वजनिक भएपछि गुगलले यसबारे स्पष्टिकरण दिएको छ । गुगलले कुनै पनि जानकारी लिक नगर्ने बताउँदै सबै प्रयोगकर्ताको जानकारी सुरक्षित राख्ने बताएको छ ।