अमेरिकी सामानमा ईयूको ‘जवाफी’ कर
प्रकाशित मिति : असार ८, २०७५ शुक्रबार
शुक्रवारबाट अमेरिकी सामानमा २.८ अर्ब युरो बराबरको कर कार्यान्वयनमा आएको छ।
युरोपेली आयोगका अध्यक्ष जँ क्लोड युङ्करले यसअघि अमेरिकाले युरोपेली सामान लगाएका करहरू सबै ‘तर्क तथा इतिहास’ विपरीत भएको बताएका छन्।
ईयूको कर मोटरसाइकलदेखि सुन्तलाको रस एवम् मदिरासम्मका अमेरिकी उत्पादनमा लागु हुनेछ।
व्यापारयुद्ध
ईयूले आफ्ना व्यापारिक स्वार्थहरूलाई सुरक्षित तुल्याउन आवश्यक जुनसुकै कदम चाल्ने युङ्करले बताए।
उनले जवाफी कदम चाल्नुबाहेक ईयूले अर्को कुनै विकल्प नदेखेको समेत उल्लेख गरे।
यसैबीच भारतले पनि अमेरिकाबाट आयात गरिने कृषिजन्य वस्तु, स्टील र फलामसहितका २९ प्रकारका उत्पादनमा कर बढाउने बताएको छ।
अगस्ट ४ देखि नयाँ कर लागु हुने र त्यसबाट हाडेबदाम, ओखर र चनासहितका उत्पादन प्रभावित हुने बताइएको छ।
भारत अमेरिकी हाडेबदामको प्रमुख आयातकर्तामध्येको एक हो।
प्रभावित
अतः भारतीय कदमबाट अमेरिकी किसानहरू मर्कामा पर्ने अनुमान गरिएको छ।
स्टील आयातमा २५ प्रतिशत र एलुमिनियममा १० प्रतिशत कर लगाउने ट्रम्प प्रशासनको कदमले विश्वव्यापारयुद्धको जोखिम बढाएको छ
ट्रम्प प्रशासनले गत मार्चमा कर लगाउने घोषणा गरेको थियो। तर केही विलम्बपछि जुन १ बाट त्यो कार्यान्वयनमा आएको थियो।
अमेरिकी कदमबाट ईयू मुलुकहरू, क्यानडा, मेक्सिको र भारतसहित अमेरिकाका नजिकका साझेदारहरू प्रभावित भएका छन्।