मौन अवस्था बलात्कारको अनुमती होइन
प्रकाशित मिति : जेष्ठ १४, २०७५ सोमबार
केही युरोपेली देशहरूले सहमति विनाको यौन सम्पर्कलाई बलात्कार मानेका छन् । हालै स्वीडेनमा पारित भएको विधेकमा कुनै पनि व्यक्तिले यौन सम्पर्कको लागि प्रष्ट तरिकाले बोलेर वा शारीरिक रुपमा संकेत गरेर सहमति दिनुपर्ने र मौन अवस्थालाई यौन क्रियाकलाको लागि दिइएको अनुमतिको रुपमा व्याख्या गर्न नपाइने कुरा उल्लेख गरिएको छ ।
स्वीडेनले सन् २०१८ को मे २३ मा उक्त विधेयक पारित गरेको थियो । अभियानकर्ताहरुले नयाँ कानुनलाई महिला अधिकारको क्षेत्रमा स्वीडेन र अरू युरोपेली देशहरुले हासिल गरेको ठूलो जीतको संज्ञा दिएका छन् ।
धेरै जसो युरोपेली देशहरुमा बलात्कारका घटनाहरुसँग पीडकबाट गरिने हिंसा वा दिइने धम्कीहरु सम्मिलित हुन्छन् । यो नयाँ कानून जुलाई एक तारिकदेखि लागू हुनेछ । त्यसपछि पीडकहरु वा उनीहरुका वकिलहरुले बलात्कारका घटनाहरुमा हिंसा वा धम्कीहरू प्रयोग भएको थियो भनेर प्रमाण जुटाउनु पर्ने छैन ।
आइसल्याण्ड, ईङ्गल्याण्ड, आएरल्याण्ड, स्कटल्याण्ड, नर्दन आएरल्याण्ड, साइप्रस, बेल्जीयम र जर्मनीले सहमतिविनाको यौन सम्पर्कलाई गैर–कानुनी मानिसकेका छन् ।
‘संसदबाट पारित यो विधेयक स्वीडेनका महिला अधिकारकर्मीहरूको लागि ठूलो उपलब्धि हो । यो परिवर्तन हासिल गर्न उनीहरुले एक दशक भन्दा अगाडिदेखि अथकरुपमा अभियान चलाइरहेका थिए’, अन्ना ब्लसले भनिन् । उनी एमनेस्टी ईन्टरनेशनलकी महिला अधिकार विषयकी अनुसन्धानकर्ता हुन् ।
स्वीडेनको बार एसोसिएशनकी महासचिव एन्ने र्यामबर्ग भने नयाँ कानूनप्रति आशावादी छैनन् । उनले सीएनएनलाई बताए अनुसार स्वीडेनको प्रचलित कानूनले यस अघिदेखि नै बलात्कारको परिभाषालाई फराकिलो बनाएको थियो । अपराधिकताको प्रकियामा नयाँ कानून प्रभावकारी हुन नसक्ने संभावना रहेको धारण उनले व्यक्त गरिन् ।
स्वीडेनमा बलात्कारका घटनाहरु बढ्दै गइरहेका छन् । सन् २०१६ को तुलनामा यस्ता घटनाहरु सन् २०१७ मा १० प्रतिशतले वृद्धि भएका थिए । महिला अधिकारकर्मीहरु भने नयाँ कानुनले यस्ता घटनाहरुमा कमी ल्याउने कुरामा आशावादी छन् ।