अष्ट्रेलियामा ग्राहकको हत्या गरेको आरोप लागेका नेपाली दोषी ठहर
प्रकाशित मिति : जेष्ठ ११, २०७५ शुक्रबार
ग्राहकको हत्या गरेको अभियोग लागेका एक नेपाली सेफलाई अष्ट्रेलियाको एक अदालतले दोषी ठहर गरको छ । अष्ट्रेलियाको भिक्टोरियास्थित बालारात करी रेष्टुरेन्टमा कार्यरत ५१ वर्षीय सेफ हरिप्रसाद ढकाललाई अदालतले दोषी ठहर गरेको हो ।
उनी अवैध रुपमा बसोबास गरिरहेको पनि खुलेको छ । ढकाललाई मेलबर्नमा जुन १ देखि जेल सजाय दिइनेछ । उनको सजाय सकिएपछि नेपाल फिर्ता पठाइने छ ।
उनीमाथि पाकिस्तानी मूलका आईटी क्षेत्रका कामदार अब्दुल्लाह सिद्दिकीलाई २०१६ अक्टोबर २५ मा चक्कु प्रहार गरेर हत्या गरेको आरोप लागेको थियो, जसमा उनी दोषी पनि ठहर भएका हुन् ।
ढकालका वकिल अलेक्जान्डरका अनुसार उनले २००० मा नेपाल छाडेका थिए । उनले अष्ट्रेलियामा प्रोटेक्सन भिसाका लागि आवेदन पनि दिएका थिए तर, त्यो अस्वीकृत भयो । २००० र २०१६ को बीचमा ढकाल न्यू साउथ वेल्स, क्विन्सल्याण्ड र भिक्टोरियामा बस्ने गर्थे ।
अलेक्जान्डरले भने, ‘हत्याको रात ढकाललाई सिद्दिकीले पछाडिबाट आक्रमण गर्न लागेका थिए र ढकालले आत्मरक्षाको लागि चक्कु प्रहार गर्दा उनको मृत्यु भयो ।’
ढकालको क्रियाकलाप पूर्वयोजनाअनुसार नभएको, उनले प्रहरीसँग सहकार्य गरेको, परिणामहरुको सामना गरेको र पछुतो व्यक्त गरेको अलेक्जान्डरले अदालतमा बताए ।
रेष्टुरेन्टमा ग्राहकको हत्या गरेपछि ढकालले रगत लत्पतिएको चक्कुलाई कपडाले बेरेर झोलामा राखी बालारात प्रहरी चौकीमा पुगी आत्मसमर्पण गरेका थिए ।
ढकालले हत्यामा आफ्नो दोष नरहेको बयान दिएका थिए । उनले सिद्दिकीलाई मारेको अस्वीस्कार त गरेनन् तर, उनले आत्मरक्षाको लागि सिद्दिकीमाथि आक्रमण गरेको बताए ।
अभियोजनकर्ताहरुले सिद्दिकीले रक्सी पिउँदै सेफलाई अश्लील गाली गलौज गर्दै अपमान गरेकोे र त्यसको झोँकमा ढकालले हत्या गरेको दावी गरेका थिए ।
अभियोजनकर्ता प्याट बोउर्कले सो घटना दुखद र नीरीह भएको भन्दै भने, ‘ढकालले एक निशस्त्र मानिसलाई आक्रमण गरेर हत्या गरे किनभने उक्त मानिसले अपमान गरेर उनलाई रिस उठाएको थियो । उसले उनलाई रिस उठाए पनि डरलाग्दो आक्रमण गरेको थिएन ।’
ढकालका वकिल अलेक्जान्डरले त्यसको प्रतिवाद गर्दै भने, ‘सिद्दिकीले विवादका क्रममा चक्कुले आक्रमण गर्न लागेपछि ढकाललाई डर लाग्यो । आक्रमण गरे ।’
अन्तत ढकाललाई अदालतले दोषी ठहर गरेको छ । र, जेल भुक्तान गरिसकेपछि नेपाल फर्काइनेछ ।