महिलाको पेटबाट निकालियो ६० किलोको डल्लो


प्रकाशित मिति : बैशाख २२, २०७५ शनिबार

वैशाख २२, एजेन्सी । धेरै महिला हुन्छन् जसको जिउको जम्माजम्मी वजन पनि ६० किलो हुँदैन । तर एकजना महिलाको भने पेटबाटै ६० किलो वजनको मासुको डल्लो निकालिएको छ ।

५ घण्टाको गहन शल्यक्रिया पश्चात् २५ जना डाक्टरको समूहले एकजना महिलाको पेटबाट झण्डै ६० किलो तौलको ट्युमर निकाल्न सफल भएका हुन् ।
कुनै पनि मानिसको जिउबाट शल्यक्रिया गरी निकालिएको यो अहिलेसम्मकै ठूलो ट्युमर रहेको बताइएको छ ।

उक्त शल्यक्रिया गत फेब्रुअरीमा अमेरिकाको कनेक्टिकटस्थित डेनबरी अस्पतालमा भएको हो । पेटभित्र त्यति तीव्र गतिमा त्यति ठूलो ट्युमर कसरी पैदा भयो भन्ने विषयमा अनुसन्धानमा जुजिटरहेका छन् अहिले डाक्टरहरु । दुई महिनाको अवधिमा ती महिलाको तौल निकै तिव्र गतिमा बढेको र पेट पनि अस्वभाविक रुपमा बढ्दै गएपछि ती महिला उपचारका लागि पुगेकी थिइन् । उनको पेटमा उक्त ट्युमर प्रतिहप्ता ५ किलोका दरले बढिरहेको थियो । शल्यक्रिया पश्चात झण्डै दुई हप्ता ती महिलालाई अस्पतालमै राखेर उपचार गरिएको थियो र त्यसपछि डिस्चार्ज गरियो ।

बिहिबार मात्र अस्पतालले उक्त सफल शल्यक्रियाका विषयमा जानकारी गराएको छ ।

उक्त ट्युमर महिलाको अण्डासयमा पलाएको थियो । तर त्यसले पेटको सबै भाग ओगटेर मुटु लगायतका अंगलाई पनि असर पार्न थालेको थियो । ट्युमले आन्द्रा थिचेपछि उनले राम्रोसँग खान पनि पाएकी थिइनन् र कुपोषित बन्दै गएकी थिइन् ।

शल्यक्रियासँगै महिलाको बायाँ अण्डासय पनि झिकेर फ्याँकिएको छ र ट्युमरका कारण बढेको पेटको केही छाला पनि फ्याँकिएको छ ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com