३३ करोड प्रयोगकर्तालाई पासवर्ड परिवर्तन गर्न अपिल, के तपाईंले गर्नुभयो ?
प्रकाशित मिति : बैशाख २१, २०७५ शुक्रबार
सोसल मिडिया कम्पनी ट्वीटरले आफ्ना लगभग ३३ करोड प्रयोगकर्तालाई पासवर्ड परिवर्तन गर्न आग्रह गरेको छ । प्राविधिक गडबडीका कारण केही पासवर्ड कम्पनीको आन्तरिक कम्प्युटर सिस्टममा स्टोर भएपछि सबै प्रयोगकर्तालाई यसका लागि अपिल गरिएको हो ।
यद्यपी, ट्वीटरले आन्तरिक अनुसन्धानमा कसैको पनि पासवर्ड नचोरिएको र त्यसको गलत प्रयोग नभएको स्पष्ट पारेको छ । ट्वीटरले सावधानी अपनाउँदै आफ्ना समस्त प्रयोगकर्तालाई पासवर्ड परिवर्तन गर्नका लागि अपिल गरेको हो । ट्वीटरका मुख्य कार्यकारी अधिकारी ज्याक डोर्सेले एक ब्लग पोष्ट गर्दै उक्त त्रुटीमा खेद व्यक्त गरेका छन् ।
यो पनि पढ्नुहोस :
फेसबुकसँगको विवादका कारण ह्वाट्स एपका सीईओले राजीनामा दिने
काठमाडौं । लोकप्रिय म्यासेजिङ सर्भिस ह्वाट्स एपका सहसंस्थापक जान कोउमले कार्यकारी प्रमुख पदबाट राजीनामा दिने भएका छन् । फेसबुकबाट उनले यसको आधिकारिक घोषणा गरेका हुन् ।
‘प्रविधिभन्दा बाहिर आफ्नो रुचिका काममा संलग्न हुन केही खाली समय चाहिएको’ उनले एक पोष्टमा लेखेका छन् ।
तर वासिंटन पोष्टमा सोमबार प्रकाशित समाचारअनुसार ह्वाट्सएपको रणनीतिका सम्वन्धमा यसको प्यारेन्ट कम्पनी फेसबुकसँग कोउमको टकराव बढेको थियो । ह्वाट्सएपको व्यक्तिगत डाटा प्रयोग गर्ने फेसबुकको प्रयासमा उनले आपत्ति जनाएका थिए ।
कोउमले आफ्नो वक्तव्यमा भनेका छन्, ‘ब्रायन (एक्टोन) र मैले ह्वाट्सएप सुरु गरेको एक दशक भइसक्यो । केही उत्कृष्ट मान्छेहरुसमेतको यो यात्रा एदकमै स्मरणीय रह्यो । तर, मेरो आफ्नै हिसाबले अगाडि बढ्ने समय आएको छ ।’
‘अहिलेको टिम विगतकोभन्दा बलियो छ र यसले धेरै राम्रो नतिजा निकाल्नेछ । म बाहिरै रहेर ह्वाट्सएपको सफलताको कामना गर्नेछु,’ उनले अगाडि लेखेका छन् ।
यूक्रेनका आप्रवासी कोउमले स्टान्डफोर्डका विद्यार्थी ब्रायन एक्टोनसँग मिलेर सन् २००९ मा ह्वाट्सएप स्थापना गरेका थिए । सन् २०१४ मा यसलाई फेसबुकले १९ अर्ब डलरमा खरिद गरेको थियो । पछिल्लो समयमा फेसबुक र ह्वाट्सएपको सम्वन्ध बिग्रेको थियो । एक्टोनले गत नोभेम्बरमा फेसबुकको आलोचना गर्दै कम्पनी छोडेका थिए ।