माउण्ट फुजीमा ज्वालामुखी विस्फोट भए टोकियो शहरलाई यस्तो खतरा
प्रकाशित मिति : बैशाख २०, २०७५ बिहीबार
जापानको प्रतिष्ठित माउण्ट फुजीमा ज्वालामुखी विस्फोट भएमा त्यसबाट आएको खरानीले टोकियो शहरमा असर पुग्ने सक्ने बताइएको छ । यो तथ्य सरकारी विपद व्यवस्थापनले मंगलबार जारी गरेको एक रिपोर्टले देखाएको हो । विस्फोटपछि टोकियोमा आइपुग्ने खरानीले सहरका सडकहरु छोपिने र पानी वितरण पनि अबरुद्ध हुने अध्ययनले देखिएको छ ।
चुचुरोको भागमात्र हिँउले छोपिएको उक्त हिमाल जापानको सबैभन्दा अग्लो पर्वत हो । टोकियोबाट १०० किलोमिटर पश्चिम रहेको यो पर्वतलाई जापानको प्रतिक मानिन्छ ।
तर माउण्ट फुजी एक सक्रिय ज्वालामुखी पर्वत पनि हो । यो भन्दा अघि सन् १७०७ मा यो पवर्तमा ज्वालामुखी विस्फोट भएको थियो । हुनत पछिल्लो दशकमा यसले सक्रिय हुने लक्षण देखाएको छैन तर क्योदो समाचार एजेन्सीले अबलोकन गरेको सरकारी अध्ययनले विस्फोट भएको अवस्थामा केन्द्रिय टोकियोमा दश सेन्टिमिटरभन्दा बढी मोटो खरानी खस्ने देखाएको छ ।
यति खरानीले सडकमा गाडी चलाउन असम्भव हुने भएकाले राजधानी अबरुद्ध हुनेछ ।
अध्ययनले खरानीको ०.५ सेन्टीमिटरले कारहरुमा यान्त्रिक समस्याहरु आउने देखाएको छ । र १ सेन्टिमिटरभन्दा बढी खरानीले सार्बजनिक विद्युत सेवा काटीने र पानी प्रशोधन प्रणाली असफल हुने देखाएको छ ।
विपद अध्ययनको नेतृत्व गरेका नोरिको उरताले सरकारले सम्भावित विस्फोटको असर जाँचेको पुष्टि गरे । यसका साथै उनले संकटको बेलामा चालिने कदमहरुबारे पनि अध्ययन भइरहेको बताए ।
“तर हामी यसको पूर्ण विवरण सार्वजनिक गर्ने अवस्थामा छैनौं । ” नोरिकोले एएफपीलाई भने । सरकारले विस्फोटले पु¥याउने क्षतीको लागत २३ अर्ब डलर हुने आँकलन गरेको छ ।
जापानमा ११० भन्दा धेरै सक्रिय ज्वालामुखीहरु रहेका छन् । जापान विश्वको सबैभन्दा धेरै ज्वालामुखी फुट्ने र भूकम्प जाने प्रशान्त महासागरको ‘आगोको घेरो’ भनिने भूभागमा रहेको छ ।
यही वर्षको जनवरीमा टोकियोको उत्तरपूर्वमा रहेको एक स्की रिजोर्टनजिक ज्वालामुखी विस्फोट हुदाँ एक जापानी सैनिक मारिएका थिए भने कयैन घाइते भएका थिए ।