दक्षिण कोरियाले निकाल्यो किम जोंग उनविरुद्ध प्रचार गर्ने स्पिकर
प्रकाशित मिति : बैशाख १९, २०७५ बुधबार
बीबीसी
उत्तर र दक्षिण कोरियाको सीमामा राखिएको लाउडस्पिकर दक्षिण कोरियाले हटाउन सुरु गरेको छ ।
मंगलबार दक्षिण कोरियाका रक्षामन्त्रालयले आफूहरुले स्पिकर हटाउने कार्य सुरु गरेको जानकारी दिएका हुन् ।
उत्तर कोरियाको तर्फबाट पनि यस्तै कदम उठाइएको संकेत पाएको उनले बताएका छन् ।
दुबै देशले सीमामा राखिएको ती लाउड स्पिकरमार्फत वर्षौंदेखि एक अर्काविरुद्ध प्रचार गर्दै आएका थिए ।
गत हप्ता दुबै देशका नेताको ऐतिहासिक भेटघाट र शान्ती स्थापनाको कोसिसबीच यसलाई सांकेतिक कदमको रुपमा हेरिएको छ ।
गत शुक्रबार उत्तर कोरियाली नेता किम जोंग उन र दक्षिण कोरियाली नेता मून जे इन दुबै देशबीचको तनाव घटाउन र प्रायद्वीपलाई परमाणु हतियारबाट मुक्त गर्ने विषयमा सहमत भएका थिए ।
परमाणु मुद्दाबारे छलफलका लागि किम जोंग उन केही हप्ताभित्रै अमेरिकी राष्ट्रपति डोनल्ड ट्रम्पसँग भेट्ने सम्भावना छ ।
दक्षिण कोरियाको लाउडस्पिकर सन् १९६० को दशकमा लगाइएको थियो र त्यतिबेलादेखि नै सीमामा पप संगीतदेखि खबरको प्रसारण गर्दै आएको थियो ।
सामग्री विशेषगरी उत्तर कोरियाली सैनिकलाई ध्यानमा राखेर प्रसारण गरिन्थ्यो ता कि उनीहरुमा आफ्ना नेता किम जोंग उनप्रति शंका पैदा गर्न सकियोस् ।
दक्षिण कोरियाले कहाँ र कति स्पिकर राखिएका छन् भन्ने बारे कहिले पुष्टि गरेन । यद्यपी, शुक्रबारको वार्ता अघि दुबै देशले यी लाउडस्पिकरमाथि प्रसारण बन्द गरेको थियो ।
दुबै देशबिच विश्वास बढाउनका लागि यस्तो गरिएको दक्षिण कोरियाले पहिले नै बताएको थियो ।
इन्टर कोरियन समिट एक दशकभन्दा लामो समयपछि दुबै कोरियाली नेताबीचको भेटघाट थियो जसको अन्त्यमा एक संयुक्त घोषणापत्रमा हस्ताक्षर गरियो ।