कुख्यात ग्वान्तानामो बे अमेरिकी जेल चालु राख्न राष्ट्रपति ट्रम्पको आदेश
प्रकाशित मिति : माघ १७, २०७४ बुधबार
अमेरिकी राष्ट्रपति डोनाल्ड ट्रम्पले क्युबामा रहेको कुख्यात ग्वान्तानामो बे अमेरिकी जेल सुचारु राख्न मंगलबार एक कार्यकारी आदेशमा हस्ताक्षर गरेका छन् । बराक ओबामाले यो कुख्यात सैन्य जेल बन्द गराउन ८ बर्षदेखि लगातार प्रयास गरेका थिए ।
खासगरी आतंककारीहरुलाई राख्ने भनिएको यो जेलमा आतंकबादको अभियोग पुष्टी नभएका कैयनलाई समेत राख्ने गरिएको छ । यो जेल चरम यातनाका कारण कुख्यात बनेको थियो । स्टेट अफ द युनियन सम्बोधन गर्नु अगाडि ट्रम्पले यो जेल संचालनमा राख्ने कार्यकारी आदेशमा हस्ताक्षर गरेका हुन् ।
सन् २००२ को जनवरीमा तत्कालिन अमेरिकी राष्ट्रपति जर्ज बुसले यो जेल खोलेका थिए । सन् २००३ मा यो जेलमा ६८० जना सम्मलाई राखिएको थियो । बुसले आफ्नो कार्यकाल समाप्त हुनु अगाडि जेलबाट ५ सय लाई स्थानान्तरण गराएका थिए भने ओबामाले ४१ जनालाई बाँकी छाडेर १९७ जनालाई स्थानान्तरण गराएका थिए । ट्रम्पले भने न त अहिलेसम्म कसैलाई पठाएका छन् न त स्थानान्तरण नै गराएका छन् ।
ग्वान्तानामो बे लाई धेरैले यातनागृहका रुपमा ब्याख्या गर्दै आएका छन् । केही पहिलो यो जेलमा चरम यातना दिइएका केही तस्विरहरु नै सार्वजनिक भएका थिए ।
तस्विर: ग्वान्तानामो बे कारागारमा चरम यातना दिइदै