युक्रेनी राजधानीमा शनिबार रातभर रुसी ड्रोन आक्रमण, तीन जनाको मृत्यु
प्रकाशित मिति : चैत्र १०, २०८१ आईतबार
Russia Ukraine War
युक्रेनको राजधानीमा शनिबार रातभर रुसी ड्रोन आक्रमणमा कम्तीमा तीन जनाको मृत्यु हुनुका साथै १० जना घाइते भएको किएभका अधिकारीहरूले आइतबार जानकारी दिएका छन् ।
“उपलब्ध जानकारी अनुसार, पाँच वर्षको बच्चासहित तीन जनाको मृत्यु भयो । अन्य १० जना घाइते भए”, किएभ शहरको सैन्य प्रशासनले सामाजिक सञ्जाल टेलिग्राममा उल्लेख गरेको छ, “घाइतेहरूमध्ये, सबैभन्दा कान्छो पीडित केवल ११ महिनाको थियो ।”
सामाजिक सञ्जालमा प्रसारित फुटेजका अनुसार, ड्रोनले किएभका धेरै जिल्लाहरूलाई लक्षित गरी व्यापक आक्रमण गरेको थियो ।
रुसी र युक्रेनी प्रतिनिधिमण्डलले सोमबार साउदी अरेबियामा अमेरिकी प्रतिनिधिहरूसँग समानान्तर युद्धविराम वार्ता गर्ने कार्यक्रम छ ।