विशेष सम्पादकीय : एनआरएन निर्वाचन आयोग विधान र कानुनसम्मत काम गर
प्रकाशित मिति : श्रावण १२, २०७४ बिहीबार
आगामी अगस्त ११ र १२ मा हुने एनआरएन अमेरिकाको चुनाव नजिकिदै गर्दा विवादहरु तीब्र भइरहेका छन् । खासगरी अध्यक्षमा गौरी जोशीको उम्मेदवारीको विषयमा उब्जिएको विवादले एनआरएन आईसीसीलाई समेत हल्लाएको छ । विधि, प्रकृया, प्रभाव लगायतका विषयमा विवाद केन्द्रीत रहेको छ । कस्ले कस्लाई प्रभावमा पार्यो वा कस्ले विधि प्रकृया मिच्यो जस्ता विषयमा चुलिएको विवाद एनआरएनमा रुची राख्ने संचारमाध्यमका लागि पनि मसला बनेका छन् ।
निर्वाचन हुँदै गर्दा एकले अर्कोलाई प्रभावमा पार्ने हरप्रकारका अझ कहिलेकाँही निकृष्ट र हदैसम्मका गतिविधि जुनसुकै देशका जस्तासुकै निर्वाचनमा हुने गर्छन्, जुन स्वभाविक हो । एनआरएन अमेरिकाको चुनावमा पनि एकले अर्कोलाई प्रभाव पार्ने हदैसम्मका कसरतहरु भइरहेका छन् । अझ एनआरएन अमेरिकाको निर्वाचन आयोगलाई प्रभावित पार्नमा एनआरएन अमेरिकाका पर्दापछाडिका खेलाडीहरुदेखि आईसीसीका व्यक्तिसमेतले सकृय सहभागिता जनाइरहेका छन् । जुन स्वभाविक पनि हो । निर्वाचनका बेला जिम्मेबार व्यक्तिसमेत गैरजिम्मेबार हुने गर्छन् । गैरजिम्मेबार र अनुशासनहिन हुनेहरुलाई जिम्मेबारीबोध गराउने विधिहरु पनि छँदैछन् ।
तर यतिबेला बल निर्वाचन आयोगको कोर्टमा छ । मुख्य जिम्मेबारी लिने बेला पनि निर्वाचन आयोगको नै हो । निर्वाचन आयोग कुनै व्यक्ति, समुह वा उम्मेदवारबाट प्रभावित नभई नियम र कानुनसंगत रुपमा स्वतन्त्र तरिकाले अगाडि बढ्नुपर्छ । सकिन्छ, आईसीसीको विधानमा नबाझिनेगरी काम अगाडि बढाउनुपर्छ । सकिदैन, अमेरिकी कानुन अनुशार एनसीसीको विधान भने कुनै हालतमा बाझिनुहुँदैन । विधान र कानुन मिच्ने अधिकार न त निर्वाचन आयोगलाई छ, न त एनसीसी वा आईसीसीका उच्चै तहका व्यक्तिलाई नै छ । जति उच्च तहको व्यक्तिले पत्र लेखेपनि वा भनेपनि तथ्य, कानुन र विधानसम्मत तरिकाले अगाडि बढ्नु निर्वाचन आयोगको जिम्मेबारी हो ।
कसैलाई कुनै कुरा चित्त नबुझे दावी विरोध गर्नसक्ने अधिकार निर्वाचन आयोग सुरक्षित गरेकै हो । निर्वाचन आयोगको काम कारवाही चित्त नबुझे न्यायायिक समिति पनि छँदैछ । न्यायिक समितिको निर्णय पनि चित्त नबुझे अमेरिकी अदालत छँदैछ ।