२८ वर्षअघि नर्सले बचाएको बच्चा डाक्टर बनेर त्यही अस्पतालमा आएपछि भावुक बन्यो माहोल
प्रकाशित मिति : आश्विन २३, २०७५ मंगलबार
अमेरिकाको क्यालिफोर्नियास्थित ल्युसज प्याकर्ड बाल अस्पतालमा विल्मा वाङ नर्सका रूपमा काम गर्छिन् । अट्ठाईस वर्षअघि उनी आफ्नो दैनिक काम गरिरहँदा समयअगावै जन्मेको बच्चालाई राम्रो देखभाल गर्थिन् ।
विल्मा नवजात शिशुहरूको हेरचाह गर्छिन् र धेरै पहिले उनले आईसीयूमा जिन्दगीको लडाईं लडिरहेको बच्चाको स्याहार गरिन् । उनले सोचेकी पनि थिइनन् होला, लगभग तीन दशकपछि तिनै बालक त्यही अस्पतालमा चिकित्सक बनेर फर्किनेछन् र दुवैले सँगै काम गर्नेछन् ।
चवन्न वर्षकी विल्माका लागि यो अनुभव भावुक बनाउने किसिमको थियो । अस्पतालमा सन् १९९० मा २९ हप्तामै जन्मेका बच्चालाई उनले खुबै सेवास्याहार गरेकी थिइन् । त्यही बच्चा उनको सहकर्मी बन्न आइपुगेको थियो ।
डक्टर ब्रान्डन सेमिनातोरलाई विल्मालाई चिनिहाले । ब्रान्डन चाहिँ विल्मा आफूलाई कसरी चिन्छिन् भनी थाहै पाएनन् ।
ब्रान्डन अस्पतालमा बाल स्नायु विशेषज्ञका रूपमा आएका हुन् । विल्मा भन्छिन्, ‘ब्रान्डनले बच्चाहरूको स्याहार गर्दा मैले उनको नाम सोधें । उनको थर मलाई चिनेको जस्तो लाग्यो । मैले उनलाई ठेगाना र अन्य कुरा सोधें । उनले आफू समयअगावै जन्मेको र राम्रो स्याहारका कारण बाँचेको बताए ।’
विल्मा थप्छिन्, ‘सबै कुरा मिल्दै आएको जस्तो मलाई लाग्यो । मैले उनलाई तपाईं सान जोसेमा बस्नुहुन्छ अनि तपाईंको बुवा प्रहरी अधिकारी हो भनी सोधें । अनि ब्रान्डन शान्त भए र उनले तपाईं नर्स विल्मा हो भनी सोधे । हामी दुवैका लागि यो भावुक र स्मरणीय क्षण रह्यो ।