शक्तिशाली ताइफुका कारण ९ को मृत्यू, ३०० भन्दा बढि घाइते
प्रकाशित मिति : भाद्र २०, २०७५ बुधबार
जापानमा मङ्गलवारदेखि आएको शक्तिशाली आँधीबाट ९ जनाको ज्यान गएको छ भने घाइते हुनेहरुको संख्या ३०० जनाभन्दा बढि रहेको एनएचके अनलाइनले जनाएको छ । जापानमा २५ बर्ष यताकै शक्तिशाली मानिएको जेबी नामक समुद्री ले जापानका धेरै क्षेत्रमा ठूलो वर्षाका साथै १७२ किलोमिटर प्रतिघण्टाको वेग भएको हावाहुरी पनि ल्याएको थियो । अधिकारीहरूले १० लाखभन्दा बढी मानिसहरूलाई आआफ्नो घर छाडी सुरक्षित स्थलतर्फ जान भनेका छन् ।
भारी वर्षासहितको आँधीको प्रकोपका कारण पश्चिमी जापानमा अधिकांश स्थानमा यातायात पनि ठप्प बनेको छ भने कान्साई अन्तराष्ट्रिय विमानस्थल जलमग्न बनेको छ । एअरपोर्टमा ३००० भन्दा बढि यात्रीहरु रोकिएको समाचारमा उल्लेख छ । बिमानस्थलमा रहेका कयौं बिमानहरुमा पानी पसेपछि तीनीहरुको सञ्चालनमा समय लाग्ने बताईएको छ । अब कहिले बिमानस्थल खुल्ने भन्नेमा केही भन्न नसकिने बिमानस्थल व्यवस्थापनले बताएको एनएचकेले उल्लेख गरेको छ ।
ओशाका बन्दरगाहमा दर्जनौं जहाजहरु बाढीले बगेको एक एक जाहाज पुलमा अड्किदा पुलमा समेत क्षति पुगेको बताइएको छ ।
हावाहुरीका कारण पश्चिम जापानमा केही ट्रकहरु राजमार्गमै पल्टिएको प्रहरीको बताएको छ । जापानी हवाई उडान कम्पनीहरुले मंगलबार राती सम्ममा कम्तिमा ६ सय आन्तरिक उडान अवरुद्ध भएको बताएका छन् ।
त्यस्तै ताइफुकै टोकियो लगायत मध्य जापानका विभिन्न स्थानहरुमा रेल सेवा अबरुद्ध हुँदा लाखौं यात्रुहरु मर्कामा परेका छन् । ठूलो हावाहुरीका साथ अगाडि बढिरहेको ताइफुका कारण क्योतो स्टेशनमा शक्तिशाली हावाहुरीका कारण सिसाको छानो उडाउँदा केही मानिस घाइते भएको बताइएको छ । ओशाकामा विद्युत प्रवाहमा अवरोध हुँदा १६ लाख भन्दा बढि घरहरु विद्युत विहिन बनेको बताइएको छ । टोकियो देखि ओशाकासम्म चल्ने सिनकानसेन पनि बन्द रहेको जापानी संचारमाध्यमहरुले जनाएका छन् ।
खतरनाक हावाहुरीको सम्भावना अझै रहेकाले आवश्यक सतर्कता अपनाउन सूचना जारी गरिएको छ । नागरिकलाई अनावश्यक रुपमा बाहिर ननिस्कन र सरकारी सूचनाहरुलाई मनन गर्न मौसमविद्हरुले सुझाएका छन् ।
उद्धार कार्यमा खट्न सबैलाई आग्रह गर्दै प्रधानमन्त्री सिञ्जो आवेले सतर्कता अपनाउन नागरिकलाई अनुरोध समेत गरेका छन् ।
सन् १९९३ मा ४८ जना मारिने वा बेपत्ता हुने गरी आएको शक्तिशाली आँधीयता यो आँधीलाई उच्च शक्तिशाली मानिएको छ ।
