घट्दो जन्मदर र कडा आप्रवासन नीतिका कारण अमेरिकाका सार्वजनिक विद्यालयहरूमा विद्यार्थी सङ्ख्यामा तीव्र गिरावट
Photo: Ameer Basheer/Unsplash
अमेरिकामा ट्रम्प प्रशासनले लाखौँ आप्रवासीहरूलाई देश निकाला गर्न थाल्नुभन्दा धेरै अघिदेखि नै त्यहाँका सार्वजनिक विद्यालयहरूले विद्यार्थी भर्ना सङ्ख्यामा ठूलो गिरावटको सामना गरिरहेका थिए। यसको मुख्य कारण साना परिवार र घट्दो जन्मदर हो। तर, हालका वर्षहरूमा लागू गरिएका कडा आप्रवासन नीतिहरूले यो समस्यालाई अझ गम्भीर बनाएका छन्।
देशकै दोस्रो ठूलो विद्यालय क्षेत्र ‘लस एन्जलस युनिफाइड स्कूल डिस्ट्रिक्ट’की बोर्ड सदस्य केली गोनेजका अनुसार लस एन्जलस काउन्टीमा विगत केही दशकदेखि जन्मदर लगातार घटिरहेको छ, जसका कारण विद्यालयहरूमा बालबालिकाको सङ्ख्यामा कमी आएको हो। एलएयुएसडीले विगत दुई दशकमा ३ लाखभन्दा बढी विद्यार्थी गुमाइसकेको छ।
अमेरिकी तथ्याङ्क विभागको तथ्याङ्क अनुसार सन् २०१० पछि देशभर १८ वर्षमुनिका बालबालिकाको जनसङ्ख्या घट्न थालेको थियो, जुन सन् २०२५ सम्म आइपुग्दा करिब २१ लाखले घटेको छ।
सार्वजनिक विद्यालयहरूले जनसाङ्ख्यिकीय सङ्कटको सामना गरिरहेकै समयमा ट्रम्प प्रशासनले ठूलो सङ्ख्यामा विदेशी नागरिकहरूलाई नियन्त्रणमा लिने र देश निकाला गर्ने प्रक्रिया तीव्र बनाएको छ। ‘माइग्रेसन पोलिसी इन्स्टिच्युट’को एक अध्ययन अनुसार ट्रम्पको दोस्रो कार्यकालको पहिलो १८ महिनामा करिब १९ लाख मानिसले अमेरिका छाडेका छन्।
आप्रवासन नियन्त्रण टोली आइसलाई सार्वजनिक विद्यालय वरपर कार्यबाही गर्न दिइएको छुटका कारण धेरै आप्रवासी परिवारहरू त्रासका कारण लुक्न बाध्य भएका छन्। गोनेजका अनुसार विद्यालयहरूले विद्यार्थी भर्नामा २ प्रतिशतको गिरावटको अनुमान गरेका थिए, तर त्यो बढेर दोब्बर अर्थात् ४ प्रतिशत पुगेको छ।
महान् मन्दीको समयपछि जन्मदर र आप्रवासन स्तर दुवै एकैसाथ यति तल्लो विन्दुमा झरेको यो पहिलो पटक हो। स्ट्यानफोर्ड विश्वविद्यालयका शिक्षा नीति विशेषज्ञ तथा अर्थशास्त्री थोमस डीका अनुसार आप्रवासन रोक्नाले जनसाङ्ख्यिकीय सङ्कटलाई अझ बढाएको छ, जसका कारण धेरै समुदायहरूले विद्यालयहरू बन्द गर्नुपर्ने पीडादायी निर्णय लिनुपरेको छ।
अमेरिकी शिक्षा विभागका अनुसार देशभरका सार्वजनिक विद्यालयहरूमा विद्यार्थीको सङ्ख्या सन् २०१९ मा उच्चतम विन्दुमा पुगेको थियो, जुन सन् २०२४ सम्म आइपुग्दा करिब १५ लाखले घटेको छ। सन् २०३० सम्ममा भर्ना दरमा थप २ लाखले गिरावट आउने अनुमान गरिएको छ।
गत वर्ष कक्षा कोठाहरूमा विद्यार्थीको सङ्ख्या ७६,००० भन्दा बढीले घटेको छ, जसमा ठूलो हिस्सा हिस्पानिक र आप्रवासी परिवारका बालबालिकाको छ।
हाइटियन शरणार्थीहरूको अस्थायी संरक्षण स्थिति रद्द गरिएपछि मियामी-डेड र ब्रोवार्ड काउन्टीका सार्वजनिक विद्यालयहरूले एकै वर्षमा करिब ३०,००० विद्यार्थी गुमाएका छन्।
ह्वाइट हाउसका प्रवक्ता लरेन बिसले देश निकाला अभियानले अमेरिकी कक्षा कोठाहरूमा भीड कम गर्ने प्रतिक्रिया दिएकी छिन्। प्रशासनका अधिकारीहरूका अनुसार सन् २०२५ को जनवरीदेखि २०२६ को जुलाईसम्ममा अमेरिकामा रहेका विदेशी मूलका मानिसहरूको जनसङ्ख्या २९ लाखले घटेको छ।
त्यस्तै, आप्रवासनमा कडाइको समर्थन गर्ने ‘फेडरेसन फर अमेरिकन इमिग्रेशन रिफर्म’का इरा मेहलम्यानका अनुसार विद्यालय सङ्ख्या घटाउनु परे पनि यो एक आवश्यक सुधार हो। उनले आप्रवासन प्रणालीको काम विद्यालयहरूलाई विद्यार्थी पुर्याउनु नरहेको बताएका छन्।
तथ्याङ्क अनुसार अमेरिकी नागरिक नै भए पनि करिब ४६ लाख बालबालिका यस्ता परिवारमा बस्छन् जहाँका सदस्यहरू देश निकालाको जोखिममा छन्। धरपकड र डिपोर्टेशनका कारण धेरै बालबालिकाहरूले मानसिक तनाव झेल्नुपरेको छ भने कतिपयले पढाइ छाडेर परिवारसँगै अमेरिका छाड्न बाध्य भएका छन्।
जन्मदरमा आएको ऐतिहासिक गिरावट र मासिक आधारमा भइरहेको आप्रवासी धरपकडका कारण आगामी दशकमा क्यालिफोर्नियाका सार्वजनिक विद्यालयहरूले मात्रै थप ७ लाख १० हजार विद्यार्थी गुमाउन सक्ने चेतावनी अध्ययनहरूले दिएका छन्। यसै कारण लस एन्जलस लगायतका धेरै क्षेत्रहरूमा विद्यालय भवनहरू बन्द गर्ने वा गाभ्ने प्रक्रिया सुरु भइसकेको छ।