यी हुन् मेरिल्याण्डमा पत्रिकाको न्युजरुममा गोली चल्दा मारिने पत्रकारहरु
प्रकाशित मिति : असार १५, २०७५ शुक्रबार
मेरिल्याण्डको अनापोलिसमा रहेको क्यापिटल गजेट दैनिकको न्युजरुपमा नै गोली चल्दा चारजना पत्रकारसहित ५ जनाको मृत्यु भएको छ । सन् १९८४ देखि प्रकाशित हुँदै आएको यो पत्रिकाको कार्यालयमा गोली चल्दा केही बरिष्ठ पत्रकारहरुको ज्यान गएको छ ।
गोलीकाण्डमा ५९ बर्षका सहायक सम्पादक रोबर्ट हियासेनको मृत्यु भएको छ । उनी सन् २०१० देखि हरेक आइतबार क्यापिटल गजेटमा स्तम्भ लेख्दै आएका थिए । बाल्टिमोर सनमा १५ बर्षसम्म काम गरेका उनी अन्य पत्रकारका लागि समेत प्रेरणाका श्रोत थिए ।
त्यस्तै गोलीकाण्डमा ६१ बर्षका जेरल्ड फिसम्यानको पनि ज्यान गएको छ । उनले उक्त पत्रिकामा २५ बर्षदेखि काम गर्दै आएका थिए । सम्पादकीय पृष्ठका सम्पादक जेरल्ड दर्शनदेखि विभिन्न चीजका ज्ञाता समेत दिए ।
त्यस्तै गोलीकाण्डमा जोन म्याकनमराको पनि मृत्यु भएको छ । उनले क्यापिटल गजेट र अन्य पत्रिकाहरुमा २० बर्षदेखि काम गर्दै आएका थिए । ५६ बर्षका यी पत्रकारले बढी खेलकुदका समाचार लेख्न रुचाउँथे । तर उनी समाचार लेख्न, सम्पादन गर्न, डिजाइन गर्न माहिर भर्सटाइल पत्रकार थिए ।
त्यस्तै ३४ बर्षीय रेबेका स्मीथको पनि ज्यान गएको छ । उनी गतबर्षमात्र पत्रिकामा सेल्स एसिस्टेनका रुपमा काम सुरु गरेकी थिइन् ।
गोलीकाण्डमा ६५ बर्षीय वेन्डी विन्टर्सको पनि ज्यान गएको छ । उनी पत्रिकामा सम्पादक तथा कम्युनिटी रिपोर्टर थिइन् । न्युयोर्कमा काम गरेकी उनी मेरिल्याण्डमा बसाई सरेकी थिइन् ।