टर्कीएमा सरकारको विरोधमा शनिबार पनि हजारौँ प्रदर्शनकारी सडकमा
प्रकाशित मिति : चैत्र ९, २०८१ शनिबार
University students shout slogans in Istanbul, Turkey, Friday, March 21, 2025, as they protest against the arrest of Istanbul’s Mayor Ekrem Imamoglu. (AP Photo/Francisco Seco)
इस्तानबुलका मेयर तथा रिपब्लिकन पिपुल्स पार्टी (सीएचपी) का नेता इकराम इमामोग्लुको गिरफ्तारीपछि टर्कीएको आन्तरिक सङ्कट गहिरिएको छ ।
हजारौँ मानिस सडकमा ओर्लिएका छन् र धेरै ठाउँमा प्रहरी र प्रदर्शनकारीबीच झडप र गिरफ्तारी भएको छ। राजनीतिक उथलपुथलका बीच टर्कीएको शेयर बजारमा विगत दुई दशकयताकै सबैभन्दा ठूलो गिरावट आएको छ भने टर्कीएको मुद्रा लिरामा पनि गिरावट आएको छ ।
टर्कीएका राष्ट्रपति रेसेप तैयप एर्दोगानले बढ्दो प्रदर्शनको निन्दा गर्दै शुक्रबारको प्रार्थनापछि आफ्नो सरकारले ‘तोडफोड’ र ’सडकमा देखिएको आतङ्क’ विरुद्ध कुनै सम्झौता नगर्ने बताएका छन् । उनले भने, “हामी सार्वजनिक अव्यवस्था स्वीकार गर्दैनौँ ।”
टर्कीएका विपक्षी नेतालाई पक्राउ गरेपछि प्रदर्शनकारीहरु देशभरका सडकमा उत्रिएका छन् । सन् २०२८ को राष्ट्रपतीय चुनावका लागि सीएचपीको उम्मेदवार घोषणा हुनुभन्दा केही दिनअघि बुधबार प्रहरीले इकराम इमामोग्लुलाई भ्रष्टाचार र चरमपन्थी समूहलाई सहयोग गरेको आरोपमा पक्राउ गरेको थियो ।
एक दिन अघि, इस्तानबुल विश्वविद्यालयले इमामोग्लुको डिप्लोमालाई अवैध घोषित गरेको थियो। राष्ट्रपति पदका उम्मेदवारका लागि विश्वविद्यालयको डिग्री वा डिप्लोमा अनिवार्य छ ।
सीएचपीको राष्ट्रपति मनोनयनको चुनाव आइतबार हुन गइरहेको छ, जसमा १५ लाख सदस्यहरूले मतदान गर्नेछन् र इमामोग्लु एक मात्र उम्मेदवार हुनुहुन्छ ।इस्तानबुलका मेयर तथा रिपब्लिकन पिपुल्स पार्टी (सीएचपी) का नेता इकराम इमामोग्लुलाई राष्ट्रपति एर्दोगानको मुख्य प्रतिद्वन्द्वी मानिन्छ ।
टर्कीएमा प्रदर्शनमा लगाइएको प्रतिबन्धको अवज्ञा गर्दै प्रदर्शनकारीहरू शुक्रबार तेस्रो दिन पनि सडकमा उत्रिएका छन् । टर्कीएको गृह मन्त्रालयले बिहीबार ५३ र शुक्रबार ९७ जना प्रदर्शनकारीलाई प्रहरीले पक्राउ गरेको जनाएको छ ।
सीएचपी एक धर्मनिरपेक्ष राजनीतिक पार्टी हो र इमामोग्लुलाई राष्ट्रपति एर्दोगानको सबैभन्दा बलियो राजनीतिक प्रतिद्वन्द्वीको रूपमा हेरिन्छ । प्रशासनले अनुसन्धानको सिलसिलामा इमामोग्लुसहित १०० भन्दा बढी राजनीतिज्ञ, पत्रकार र व्यापारिक नेताहरूलाई गिरफ्तार गरेको छ ।