रत्नपार्कदेखिको प्रेमयात्रा
प्रकाशित मिति : श्रावण ६, २०७४ शुक्रबार
–
एक दिन दयाहाङ राईले हात समाउँदै बेनुका राईलाई भने, ‘मलाई माफ गर है, तिमीलाई म धोका दिँदै छु ।’
‘धोका’ शब्द सुन्दा बेनुकाको अनुहारमा जुन निराशा छाउनुपर्ने थियो, छाएन । बरु दयाले घुमाएर आफूलाई प्रेम प्रस्ताव राखेको सुइँको उनको सिक्स्थ सेन्सले पाइसकेको थियो । करिब एक वर्षदेखि साथीको साइनोमा रहँदै आएका यी दुई नजानिँदो पाराले प्रेमजालमा फस्दै थिए । दयालाई लाग्थ्यो– ‘बेल फोरेकै राम्रो, मन खोलेकै राम्रो ।’
एक वर्षपछि दयाले मन खोले ।
‘थोरै याद छ, वानेश्वरतिरै हो कि भेटेर प्रस्ताव राखेको,’ दयाले सम्झिए, ‘साथी थिइन्, प्रेमी बनाउँछु भनेको थिएँ ।’
बेनुका चाहिँ त्यो बेला केही बोल्न सकिनन् । ‘हेरूँ, के हुन्छ’ भन्दै उनी घर पुगिन् । दया रंगमञ्चमा करिअर बनाउँदै थिए, बेनुका गायनमा । प्रस्ताव खेर पो जाने हो कि ? दया सशंकित थिए । केही समयमै फोनको घन्टी बज्यो । बेनुकाकै थियो फोन । घुमाएर लामो समय गफ गरेपछि पनि बेनुकाले औपचारिक स्वीकृति भने दिन सकिनन् ।
प्रेम शब्दमा भन्दा भावमा झल्किनुपर्छ भन्ने यी दुईको मान्यता थियो । दयाको प्रस्तावलाई बेनुकाले भावमै स्वीकार गरेकी थिइन् । यसपछि भेटहरूमा फरक अनुभूति हुन थाल्यो रे । सधैं साथी ठानेर हात समाउने दयाले प्रेमप्रस्ताव राखेपछि चाहिँ अलिकति छुँदा पनि फरक महसुस गर्न थालिन् बेनुकाले । दयाले पनि त्यति बेलाको झडका अझै भुल्न सकेका छैनन् ।
‘उनले छुँदा नर्भस भएकी थिएँ,’ बेनुकाले भनिन्, ‘उनी त झन् मभन्दा बढी नर्भस देखिन्थे ।’
बेनुका र दयाको प्रेमयात्रा रत्नपार्कबाट सुरु भएको थियो । तर, त्यो बेला कुनै योजना थिएन । न बेनुका दयालाई भेट्न आएकी थिइन्, न दया बेनुकालाई नै । आआफ्नै साथीहरूका झुन्डमा मिसिएका थिए उनीहरू । तिनताक रत्नपार्कमा रातो घर थियो, यो अहिले छैन । पहिलोपटक दयालाई बेनुकाले त्यही रातो घरको झयालमा चियाइरहेको अवस्थामा देखेकी थिइन् । अनामनगरस्थित दोभान रेकर्डिङ स्टुडियोमा गीत रेकर्ड गराउन तन्नेरीको झुन्ड रत्नपार्कबाट हिँडेको थियो । त्यो झुन्डमा दया र बेनुका दुवै थिए । रेकर्डिङ स्टुडियोसम्म पुग्दा सबै साथी हराए । मात्रै दया र बेनुका बाँकी रहे । त्यही बेला थियो, एकअर्कालाई नजिकबाट नियालेको ।
बिस्तारै सम्बन्धको डोरी कसिलो बन्दै गयो । संगीतमा राम्रो प्रगति गर्दै गएकी बेनुकालाई कला र संगीत बुझ्ने साथीको खाँचो थियो । दया उनको चाहना बुझेर संगीतमा करिअर बनाउने सल्लाह दिइरहन्थे । ‘दोस्रो भेटमै उनले गीत गाउन दिएको हिम्मत म कहिल्यै भुल्दिनँ,’ गायिकाको परिचय बनाइसकेकी बेनुकाले सोमबारको भेटमा सुनाइन् ।
‘फिटिक्कै डराउनुपर्दैन है, लामो सास फेरेर स्टेजमा जाऊ, त्यस्ता डर कता भाग्छन् कता,’ शालीन मुस्कान छर्दै दयाले यसरी हौसला दिएका थिए ।
भोजपुरका दयाहाङ काठमाडौंमा काकासँग बस्थे । खोटाङकी बेनुकाले दयासँग सात वर्षको प्रेम अनुभव बटुलेपछि बिहे गरिन् । आठ वर्षअघि मात्रै लगनगाँठो कँसेका उनीहरू यति बेला चारवर्षे छोराको अभिभावक बनेका छन् । दयाहाङ रंगमञ्चसँगै फिल्ममा स्थापित भएर नायकको छवि बनाए । बेनुका पनि गायिकाका रूपमा चिनिइन् । ‘पर्खाइ’ र ‘सा.. द फस्ट नोट’ गरी दुई एल्बम निकालेकी बेनुका गीतसंगीतमा सक्रिय छिन् ।
बिहेपछि बिहानै दयाले तातो चिया ओछयानमा पुर्याएको क्षण बेनुकालाई अहिले अतीत बन्दै छ । दयाको व्यस्तता हात्तै बढेको छ, जसको असर परिवारमा पर्न थालेको छ । बेनुका बेखुसी पनि छैनन् । ‘सेलिब्रिटी लाइफ यस्तै हुन्छ,’ उनले भनिन्, ‘उनको प्रगतिमा मेरो मुस्कान झल्किएको पाउँछु ।’
उनका अनुसार दया माछाका परिकार निकै मीठो पकाउँछन् । दयाबाटै बेनुकाले पनि माछाका परिकार बनाउन सिकेकी हुन् ।
पत्नीको सकारात्मक साथले नै रंगमञ्चदेखि फिल्म क्षेत्रमा खुलेर जम्न पाएको दया बताउँछन् । सेलिब्रिटीको जीवनशैली राम्रोसँग महसुस गर्न सक्ने क्षमता बेनुकामा भएको हुँदा दुवैको सम्बन्ध विश्वासिलो भएको दयाको दाबी छ ।
मण्डला थिएटर बनाउने सपनादेखि फिल्ममा सफल हुन बेनुकाको ठूलो भूमिका रहेको दया सुनाउँछन् । उनी पनि ससानो कुरा बेनुकासँगै सल्लाह लिन्छन् । दुवै एकअर्काका अभिभावक बन्न खोज्छन् । ‘यसले गर्दा सेल्फ डिसिजन गर्ने बानी हराउँदो रहेछ,’ दयाले सुनाए, ‘अचेल एक्लै निर्णय गर्न सिकेको छु ।’
३० भन्दा बढी फिल्म खेलिसकेका दयाको अभिनयप्रति चाहिँ बेनुका अझै आशावादी छिन् । ‘दयाले आफ्ना लागि कहिले फिल्म खेल्छन् कुन्नि ?’ उनी भन्छिन्, ‘उनीभित्र अनेक पात्र छन्, जुन कलामार्फत अझै निस्किन बाँकी छन् ।’
दिनभरिको सुटिङ र मिटिङको थकानबाट दया घरभित्र आउँदा चाहिँ मुस्कुराएकै हुन्छन् । उनी तनावमा छन् भने बेनुकाले थाहा पाइहाल्छिन् । दया भने हाँसेरै टार्छन्, अरूलाई दु:ख देखाउँदैनन् । ‘कहिलेकाहीँ रिस पनि उठ्छ, फेरि मुस्कान हेर्छु, माया लाग्छ,’ बेनुकाले भनिन्, ‘दु:ख सबै आफैंलाई भन्ने विचार छ उनको ।’
इमानदार, परिवारप्रति जिम्मेवार, सरल स्वभाव दयाका बेनुकालाई मन पर्ने बानी हुन् भने, अलि लथालिंग हुने, स्ट्रिक्ली बोल्न नसक्ने, साथीभाइ र आफन्तको कुरा टार्न नसक्ने स्वभाव अलि मन पर्दैन ।
त्यस्तै, बेनुकाको समझदारीबाट दया प्रभावित छन् । फ्यामिली म्यानेज गर्ने र लगनशील स्वभाव छ रे बेनुकाको । आवश्यक निर्णय लिन नसक्ने, एकोहोरोपन र बढी नै डिपेन्डेन्ट हुने बेनुकाको बानी चाहिँ दयालाई मन पर्दैन ।
दयाहाङलाई बेनुकाको
मन पर्ने बानी
समझदार
फ्यामिली हेर्न सिपालु
लगनशील
मन नपर्ने बानी
निर्णय लिन नसक्ने
एकोहोरोपन
बढी नै डिपेन्डेन्ट
बेनुकालाई दयाहाङको
मन पर्ने बानी
इमानदार
परिवारप्रति जिम्मेवार
सरल स्वभाव
मन नपर्ने बानी
लथालिंगेपन
स्ट्रिक्ली बोल्न नसक्नु
कुरा टार्न नसक्नु