अमेरिकाको टेक्सासमा अध्यागमन अधिकारीको गोली लागेर २८ वर्षीय युवक घाइते
तस्वीर : आइस
अमेरिकाको टेक्सास राज्यस्थित अस्टिन सहरमा आइतबार दिउँसो अमेरिकी आइसका एक एजेन्टले गोली चलाउँदा २८ वर्षीय भेनेजुएलाका नागरिक विल्बर राफेल गार्सेस पेरेज गम्भीर घाइते भएका छन्। सहरको उत्तरी क्षेत्रमा स्थानीय समय अनुसार दिउँसो १ बजेतिर यो घटना घटेको हो।
अस्टिन-ट्राभिस काउन्टी ईएमएसका प्रमुख रोबर्ट लकर्ट्जका अनुसार पीडितको छातीमा एक गोली लागेको छ। अस्टिनका मेयर किर्क वाटसनले उनको अवस्था गम्भीर रहे तापनि अहिले स्थिर रहेको जानकारी दिएका छन्।
घाइते गार्सेस पेरेजका वकिल केट लिन्कन-गोल्डफिन्चका अनुसार उनलाई अस्पतालमा सामान्य उपचारपछि आइसको हिरासतमा पठाइएको छ। वकिल लिन्कनले उनका परिवार र श्रीमतीलाई भेट्न नदिइएको र घटनाबारे स्पष्ट जानकारी नदिइएको भन्दै चिन्ता व्यक्त गरेकी छन्।
सङ्घीय कानून प्रवर्तन स्रोतका अनुसार डिपोर्टेशनको आदेश पाएका र अमेरिकामा अवैध रूपमा बसोबास गरिरहेका गार्सेस पेरेजलाई नियन्त्रणमा लिन खोज्दा यो घटना भएको हो। यद्यपि, उनका वकिलले उनी कानूनी रूपमा नै अमेरिका प्रवेश गरेको दाबी गरेकी छन्।
अस्टिन सिटी काउन्सिलका सदस्य माइक सिगलका अनुसार आइस एजेन्टले पहिले ती व्यक्तिको गाडीमा आफ्नो गाडीले ठक्कर दिएका थिए र त्यसपछि ओर्लेर कम्तीमा ५ पटक गोली चलाएका थिए।
घटनापछि अस्टिनका मेयर किर्क वाटसन र अमेरिकी सांसद ग्रेग कासारले घटनाको निष्पक्ष र स्वतन्त्र छानबिन हुनुपर्ने तथा एजेन्टको ‘बोडी क्यामेरा’ फुटेज तुरुन्त सार्वजनिक गरिनुपर्ने माग गरेका छन्।