नयाँ पब्लिक चार्ज नियम भोलिदेखि, आप्रवासी भिसा अन्तरवार्तामा यस्ता प्रश्न सोधिने
वासिङ्टन — अमेरिकामा आप्रवासी भिसाका लागि अन्तरवार्ता दिन लागेका आवेदकहरूले अमेरिकामा पुगेपछि आफ्नो बसोबास, रोजगारी र स्वास्थ्य बिमासम्बन्धी योजनाबारे विस्तृत जानकारी दिन तयार रहनुपर्ने भएको छ। अमेरिकी दूतावासले जारी गरेको प्रश्नावलीअनुसार अन्तरवार्तामा आवेदकले अमेरिकामा आफ्नो जीवनयापन खर्च कसरी व्यवस्थापन गर्ने र सार्वजनिक सुविधामा निर्भर हुनबाट कसरी जोगिने भन्ने विषयमा प्रश्नको सामना गर्नुपर्ने हुन सक्छ।
अमेरिकी दूतावासले जारी गरेको आप्रवासी भिसा अन्तरवार्ताको तयारीसम्बन्धी प्रश्नावलीमा सबै आप्रवासी भिसा आवेदकले अमेरिकामा आफ्नो जीवनयापन खर्च व्यवस्थापन गर्ने योजनाबारे छलफल गर्न तयार रहनुपर्ने उल्लेख गरिएको छ। अमेरिकी अध्यागमन कानुनअनुसार आवेदक सार्वजनिक सुविधामा निर्भर नहुने विषयलाई अन्तरवार्तामा समेट्न सकिने दूतावासले जनाएको छ।
अमेरिकामा कहाँ बस्ने?
अन्तरवार्ताका क्रममा आवेदकले अमेरिकामा पुगेपछि कहाँ बस्ने योजना बनाएको छ भन्ने प्रश्न सोधिन सक्नेछ। दूतावासले आवेदकलाई सम्भव भएसम्म बस्ने स्थानको निश्चित ठेगानासमेत बताउन तयार रहन सुझाव दिएको छ।
यदि आवेदकले अमेरिकामा पुग्नुअघि नै बस्ने ठाउँको व्यवस्था गरेको छैन भने घर कसरी खोज्ने योजना बनाएको छ भन्नेबारे स्पष्ट जानकारी दिनुपर्ने हुन सक्छ। अमेरिकामा पुगेपछि आवेदकसँगै अरू को–को बस्नेछन् भन्ने प्रश्न पनि सोधिन सक्ने दूतावासको प्रश्नावलीमा उल्लेख छ।
अमेरिकामा के काम गर्ने योजना छ?
वयस्क आप्रवासी भिसा आवेदकलाई अमेरिकामा पुगेपछि कस्तो काम गर्ने योजना छ भन्ने प्रश्न सोधिन सक्नेछ। आवेदकले आफूले गर्न चाहेको कामसँग सम्बन्धित आफ्नो शिक्षा, तालिम र कामको अनुभवबारे जानकारी दिन तयार रहनुपर्नेछ।
यदि आफूले गर्न चाहेको कामका लागि थप तालिम, अनुमतिपत्र वा प्रमाणपत्र आवश्यक पर्ने अवस्था छ भने त्यो पूरा गर्दासम्म आफ्नो र आफूसँगै जाने परिवारका सदस्यहरूको आर्थिक खर्च कसले व्यवस्थापन गर्नेछ भन्ने प्रश्न पनि सोधिन सक्नेछ।
आवेदकले रोजगारी खोज्न सुरु गरिसकेको भए कहाँ र कसरी रोजगारी खोजिरहेको छ तथा त्यसका लागि गरिएका प्रयासहरूबारे पनि जानकारी दिनुपर्ने हुन सक्छ। अमेरिकामा काम सुरु गरेको पहिलो वर्षमा आफूले कति आम्दानी गर्ने अपेक्षा गरेको छ भन्ने प्रश्नसमेत सोधिन सक्ने दूतावासले जनाएको छ।
स्वास्थ्य बिमासम्बन्धी प्रश्न
आवेदक र उनीसँगै अमेरिका जाने परिवारका सदस्यहरूको स्वास्थ्य बिमासम्बन्धी योजनाबारे पनि अन्तरवार्तामा प्रश्न हुन सक्नेछ।
आवेदकसँग आफू र आफ्ना आश्रित परिवारका सदस्यलाई अमेरिकामा समेट्ने स्वास्थ्य बिमा छ कि छैन भन्ने प्रश्न सोधिन सक्छ। त्यसैगरी, परिवारका कुनै सदस्यको विद्यमान स्वास्थ्य बिमा योजनामा आवेदक र उनीसँगै जाने परिवारका सदस्यलाई थप्न सकिन्छ कि सकिँदैन भन्नेबारे पनि जानकारी मागिन सक्नेछ।
यदि आवेदक वा परिवारका सदस्यलाई समेट्ने स्वास्थ्य बिमा योजना पहिले नै नभएमा सम्भावित स्वास्थ्य बिमा योजनाबारे विस्तृत जानकारी प्रस्तुत गर्नुपर्ने हुन सक्छ। यस्तो अवस्थामा बिमाको मासिक शुल्क कति पर्छ भन्ने जानकारीसमेत दिन तयार रहनुपर्ने दूतावासले जनाएको छ।
अन्तरवार्ताअघि के तयारी गर्ने?
दूतावासको प्रश्नावलीअनुसार आप्रवासी भिसा आवेदकले अमेरिकामा पुगेपछि कहाँ बस्ने, कसरी आवासको व्यवस्था गर्ने र आफूसँगै को–को बस्ने भन्ने विषयमा स्पष्ट योजना तयार राख्नुपर्नेछ।
त्यसैगरी, अमेरिकामा गर्न चाहेको काम, त्यसका लागि आवश्यक शिक्षा वा तालिम, विगतको कामको अनुभव तथा थप अनुमतिपत्र वा प्रमाणपत्र आवश्यक भए त्यसको व्यवस्था कसरी गर्ने भन्नेबारे पनि आवेदक स्पष्ट हुनुपर्नेछ।
रोजगारी खोज्न सुरु गरिसकेको अवस्थामा आफूले गरेका प्रयासहरूबारे जानकारी दिन सक्ने गरी तयारी गर्नुपर्नेछ। पहिलो वर्षमा अपेक्षा गरिएको आम्दानीबारे पनि स्पष्ट जानकारी राख्न दूतावासले भनेको छ।
आवेदकले आफू र आफूसँगै अमेरिका जाने परिवारका सदस्यहरूको स्वास्थ्य बिमासम्बन्धी अवस्थाबारे पनि जानकारी राख्नुपर्नेछ। स्वास्थ्य बिमा नभएको अवस्थामा सम्भावित बिमा योजनाहरू र तिनको मासिक शुल्कबारे जानकारी तयार राख्नुपर्नेछ।
अमेरिकी दूतावासले जारी गरेको दस्तावेजमा यी विषयहरू आप्रवासी भिसा अन्तरवार्ताका क्रममा छलफल हुन सक्ने विषयका रूपमा उल्लेख गरिएका छन्। प्रत्येक आवेदकलाई उल्लेख गरिएका सबै प्रश्न अनिवार्य रूपमा सोधिने भन्ने कुरा दस्तावेजमा उल्लेख गरिएको छैन। दूतावासले यस विषयमा थप जानकारीका लागि अमेरिकी विदेश मन्त्रालयको वेबसाइट हेर्न आग्रह गरेको छ।