कालंगा हाइड्रो पावरको सुरुङमा फसेका मजदुरको उद्धारमा कठिनाइ, काठमाडौंबाट प्राविधिक टोली जाँदै
प्रकाशित मिति : कार्तिक १८, २०७६ सोमबार
बझाङको कालंगा हाइड्रो पावरको सुरुङमा फसेका ४ मजदुरको उद्धारमा कठिनाइ भएको छ । स्थानीय टोलीले उद्धार गर्न नसकेपछि काठमाडौंबाट प्राविधिक टोली जाँदै छ ।
नगरपालिकाको दारिमगाढबाट टनेल छिरेका दैलेखका कर्णबहादुर शाही, महेन्द्र शाही, अछामका महेन्द्र साउद र बझाङका शेरबहादुर धामी आइतबार दिउँसो ३ बजेबाट सम्पर्कविहीन भएको प्रहरीले जनाएको छ । सुरुङको सफाइ गर्न ट्याक्टरसहित छिरेको टोली सम्पर्कविहीन भएको प्रहरीले बताएको छ । प्रहरीले जानकारी प्राप्त हुनसाथ उद्धारको प्रयास थालेको बझाङका प्रहरी प्रमुख प्रहरी नायब उपरीक्षक गणेश बमले बताउनुभयो ।
‘स्थानीय टोलीभित्र गयो तर भित्र अक्सिजन नपुगेपछि दुईजना बेहोस भएपछि अहिले उद्धार स्थगित गर्न निर्देशन दिइएको जिल्ला प्रशासन कार्यालय बझाङले जनाएको छ । काठमाडौंबाट विज्ञसहितको टोली हेलिकप्टरमा जाँदै छ । सम्पर्कविहीन भएलगत्तै प्रहरी उद्धारमा खटिए पनि अक्सिजन अभावमा सुरुङ प्रवेश गर्न नसकिएको जिल्ला प्रहरी कार्यालय, बझाङका प्रहरी प्रमुख प्रहरी नायब उपरीक्षक बमले जानकारी दिनुभयो ।
अक्सिजन नपुगेपछि इलाका प्रहरी कार्यालय, बुङ्गलका प्रहरी सहायक निरीक्षक अमर भण्डारीलगायतको टोली अन्योलमा परेको छ । प्रहरी नायब उपरीक्षक बमका अनुसार, अक्सिजनकै कारण प्राविधिक टोलीले पनि उद्धार कार्य अघि बढाउन सकेको छैन ।
