Follow @khasokhasmag

नेकपालाई सीको सुझाव : स्वच्छता र सुशासनमा ध्यान दिनू


प्रकाशित मिति : आश्विन २६, २०७६ आईतबार

चीनका राष्ट्रपति सी चिनफिङले स्वच्छता र सुशासनमा ध्यान दिन सत्तारूढ दल नेपाल कम्युनिस्ट पार्टी (नेकपा)का नेतालाई सुझाव दिएका छन् । नेपाली नेताहरू दिन प्रतिदिन विलासी बन्दै गइरहेको अवस्थामा चीनका राष्ट्रपति सीले विलासी जीवन त्यागेर सादा जीवन ग्रहण गर्न नेताहरूलाई सुझाएका छन् ।

नेपालको दुई दिने राजकीय भ्रमणमा रहेका सीले आइतबार नेकपा सचिवालय सदस्यका नेताहरूसँग भेटवार्ता गर्दै सो सुझाव दिएका हुन् । भेटवार्तामा सहभागी नेकपा सचिवालय सदस्य एवं प्रवक्ता नारायणकाजी श्रेष्ठले कम्युनिस्ट पार्टीले स्वच्छता र सुशासनमा ध्यान दिनुपर्ने सुझाव राष्ट्रपति सीले दिएको बताए ।

‘शासन सञ्चालन गर्न कम्युनिस्ट पार्टीले पहिले आफूभित्र नै स्वच्छता र सुशासनमा ध्यान दिनुपर्छ, यो हाम्रो अनुभव हो,’ राष्ट्रपति सीको भनाइ उद्धृत गर्दै प्रवक्ता श्रेष्ठले भने, ‘चिनियाँ कम्युनिस्ट पार्टीले चीनमा शासन गर्न सकेको क्रान्ति गर्दा एकचोटि सत्ता कब्जा गरेको आधारमा होइन, निरन्तर जनसेवा गरेर जनताको समर्थन पाएकाले हो ।’ चीनमा शासन सत्ता सञ्चालन गर्न कम चुनौतीपूर्ण नभएको तथा जनताको समर्थन नभएको भए त्यो सम्भवसमेत नभएको सीले भेटवार्ताको क्रममा भनेका छन् । सीले नेताहरू इमानदार र नैतिक बन्नुपर्नेमा जोड दिँदै जनतालाई केन्द्रबिन्दुमा राखेर काम गर्दा सहजै सहयोग पाइने विश्वास व्यक्त गरे ।

पछिल्लो समय नेपालले राजनीतिक उपलब्धि र स्थायित्व हासिल गरेको बताउँदै उनले विकासको बाटोमा चीन सधैं साथमा रहने प्रतिबद्धता व्यक्त गरे । नेपाल र चीनको सम्बन्ध वर्षौंदेखि राम्रो भएको र यसलाई अझ सुदृढ गर्दै लैजानुपर्ने उनले बताए । चीन र नेपालको कम्युनिस्ट पार्टीको सम्बन्ध अझै सुमधुर र मजबुत बनाउनुपर्ने र त्यसलाई साझा कार्यक्रम बनाएर अनुभव आदान प्रदान गर्नुपर्ने आवश्यकता औंल्याए ।

कम्युनिस्ट क्रान्तिको आधारमा मात्रै सत्ता चलाएको नभएर उनले धेरै प्रतिकूलताबीच पनि जनतालाई उपलब्धिहरू दिन सकेकै कारण समाजवादको दिशामा नै अगाडि बढेको बताए ।
भेटवार्तामा नेकपा अध्यक्ष एवं पूर्वप्रधानमन्त्री पुष्पकमल दाहालले दुई कम्युनिस्ट पार्टीबीचको आपसी सम्बन्धलाई नयाँ स्तरमा विकास गर्ने र एकअर्काका अनुभव साटासाट गरेर अगाडि बढ्ने प्रतिबद्धता व्यक्त गरेका छन् । ‘नेपालको समृद्धिमा चिनियाँ सरकार र कम्युनिस्ट पार्टीको सहयोग आगामी दिनमा अझ बढ्ने मैले विश्वास लिएको छु,’ दाहालले भने ।

अध्यक्ष दाहालले बीआरआईमा हस्ताक्षर गरी नेपाल र चीनबीचको सम्बन्धमा नयाँ युग सुरु भएको बताउँदै दुवै देश र जनताको हितका निम्ति समयसीमा निर्धारण गरी आयोजनाहरूको छनोट र तीव्र कार्यान्वयनमा जोड दिनुपर्ने बताए । याे खबर आजको राजधानीदैनिकमा छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com