अमेरिकामा प्रचण्डका ९ दिन
प्रकाशित मिति : चैत्र १३, २०७५ बुधबार
मार्च १८ तारिख सोमबार अमेरिकाको वासिंटन डिसीमा आइपुगेका थिए नेकपा अध्यक्ष तथा पूर्व प्रधानमन्त्री पुष्पकमल दाहाल प्रचण्ड । पत्नी सीता दाहालको उपचारका लागि अमेरिका आएका प्रचण्डका साथमा छोरी गंगा दाहाल र सीता दाहालको हेरविचार गर्ने नर्स अम्बिका पुडासैनी समेत थिइन् ।
पहिलो दिन सोमबार वासिंटन डिसीमा रहेको राजदूत निवासमा आराम गरेका प्रचण्डले अमेरिकामा आफू आउँदाको प्रतिकृयाबारे राजदूत अर्जुन कार्कीसँग सोधपुछ गरेका थिए । एफबीआईएको प्रिक्लीयरेन्सबाटै अमेरिका आएका प्रचण्डको बारेमा राजदूतसमेत अन्यौलमा पर्दा केहीसमय त्रासको वातावरण समेत बनेको थियो ।
दोश्रो दिन मंगलबार विहान मेरिल्याण्डको बाल्टिमोरमा रहेको जोन हप्किन्स मेडिसिनमा सिता दाहाललाई लगिएको थियो । त्यहाँ प्रचण्ड, छोरी गंगा दाहाल, नर्स र राजदूत अजुर्न कार्की समेत साथमा थिए ।
मंगलबार नै प्रचण्डलाई वासिंटन डिसीमा रहेको नेपाली दूतावासमा स्वागत गरिएको थियो । नेपाली दूतावासमा राजदूत अर्जुन कार्की सहित दूतावासका कर्मचारीहरुले प्रचण्डलाई स्वागत गरेका थिए ।
यसैबीचमा प्रचण्ड र नेपालका लागि पूर्व अमेरिकी राजदूत स्कट डेलिसीबीच भेटवार्ता समेत भयो । प्रचण्डले वासिंटन डिसीमा रहेको राजदूत निवासमै नेकपा समर्थक केही कार्यकर्ता र नेपाली समुदायका व्यक्तिसँग पनि भेटघाट गरे । सिता दाहाललाई पनि वासिंटन डिसीमा नै रहेको जर्जटाउन यूनिभर्सिटी मेडिकल सेन्टरमा चेकजाँच गराइयो ।
शुक्रबार सिता दाहाललाई थप चेकजाँचका लागि अलाबामामा रहेको युनिभर्सिटी अफ अलाबामा एट बरमिन्गम अर्थात् युएबी अस्पतालमा लगियो । पूरै सप्ताहन्त सिता दाहालको उपचारमा नै बित्यो ।
आइतबार वासिंटन डिसीमा नै प्रचण्डले नेपाली समुदायका विभिन्न व्यक्तिसँग समुहगत भेटघाटहरु गरे । आइतबार बेलुका झण्डै ५० जना नेपाली समुदायका विभिन्न व्यक्तिलाई बोलाएर छलफल समेत आयोजना गरिएको थियो, जसको संचालन राजदूत अर्जुन कार्कीले गरेका थिए ।
सोमबार प्रचण्ड र अमेरिकी विदेशमन्त्रालयको मध्य तथा दक्षिण एसिया प्रमुख एलिस बेल्सबीच विदेशमन्त्रालयमा नै भेटघाट भयो । यो भेटघाटमा दुइदेशबीचको सम्बन्धबारे छलफल भयो ।
सोमबार नै मेरिल्याण्ड राज्यको संसदको प्रचण्डले अबलोकन गरे । सांसद ह्यारी भण्डारीले त्यहाँ प्रचण्डलाई स्वागत गरेका थिए । सोमबार नै बाल्टिमोरमा रहेको महावाणिज्यदूत प्रेमराजा महतको रेष्टुरेण्टमा प्रचण्डलाई स्वागत गरियो । त्यहाँ केही नेपाली समुदायका व्यक्तिको पनि उपस्थीति रहेको थियो ।
त्यसपछि प्रचण्डसहित सबैजना न्युयोर्क आए । न्युयोर्कमा मंगलबार राष्ट्रसंघका लागि नेपाल मिसनको कार्यालयमा प्रचण्डको स्वागत गरियो । राजदूत अमृत राई, महावाणिज्यदूत पुष्प भट्टराई लगायत कन्सुलेट र मिसनका कर्मचारीहरुले प्रचण्डको स्वागत गरेका थिए ।
पत्नी सिता दाहालको उपचार र औषधीमा बदलावपछि मंगलबार बेलुका नै न्युयोर्कको जोन अफ केनेडी विमानस्थलबाट सबैजना नेपाल फर्के । विमानस्थलमा विदाई गर्न राजदूतहरु, मिसन र कन्सुलेटका कर्मचारीहरु लगायत केही नेकपा समर्थकहरु पुगेका थिए ।
