रिपब्लिकनले अगाडि सारेको स्वास्थ्य सेवा विधेयक प्रतिनिधि सभाबाट पारित, अब सिनेटमा लगिने
प्रकाशित मिति : २ पुस २०८२, बुधबार
तस्बिर: अलेजान्ड्रो बार्बा
अमेरिकी प्रतिनिधि सभाले स्वास्थ्य विधेयक पारित गरेसँगै ‘ओबामाकेयर’ अन्तर्गतको कर छुट अन्त्य हुने लगभग निश्चित भएको छ। रिपब्लिकनहरूले अगाडि सारेको उक्त स्वास्थ्य सेवा विधेयक प्रतिनिधि सभाबाट पारित भएको हो।
पारित भएको विधेयकले ‘अफोर्डेबल केयर एक्ट’ (एसीए अर्थात् ओबामाकेयर) अन्तर्गत दिइँदै आएको कर छुट (ट्याक्स क्रेडिट) को म्याद थप गर्ने विषयलाई भने सम्बोधन गरेको छैन।
यससँगै ती अतिरिक्त अनुदानहरू यस वर्षको अन्त्यमा स्वतः समाप्त हुने लगभग निश्चित भएको छ। विधेयक २१६–२११ मतले पारित भएको हो।
यो विधेयक सिनेटमा पुग्नेबित्तिकै अस्वीकृत हुने सम्भावना प्रबल छ। साथै, कर छुटको भविष्यलाई लिएर रिपब्लिकन पार्टीभित्र देखिएको गहिरो मतभेदलाई पनि यसले समाधान गर्न नसकेको देखिएको छ। धेरै रिपब्लिकनहरूले सन् २०२६ सम्म सम्झौताका लागि वार्ता जारी राख्ने बताएका छन्।
स्वास्थ्य नीति अनुसन्धान संस्था ‘केएफएफ’ का अनुसार, यी अतिरिक्त कर छुटहरू डिसेम्बर ३१ मा समाप्त भएमा आगामी वर्ष औसत बीमा प्रिमियम १,०१६ डलरले बढ्नेछ।
हाउस रिपब्लिकनहरूको यो स्वास्थ्य विधेयकले साना व्यवसायलाई आफ्नै स्वास्थ्य बीमा योजना प्रस्ताव गर्न अनुमति दिने, ‘फार्मेसी बेनिफिट म्यानेजर’ भनिने औषधि मध्यस्थकर्तामाथि कडाइ गर्ने र ओबामाकेयर अन्तर्गत बीमा लिएका व्यक्तिहरूको आफ्नै खर्च घटाउने अर्को प्रकारको अनुदानका लागि रकम छुट्याउने व्यवस्था गरेको छ।
रिपब्लिकनहरू हप्तौँदेखि नेतृत्वसँग यस ढाँचाबारे छलफलमा थिए। तर प्याकेजमा म्याद सकिन लागेको कर छुट विस्तार समावेश नहुने स्पष्ट भएपछि, मध्यमार्गी सांसदहरूले सीमित रूपमा भए पनि त्यसबारे संशोधन प्रस्तावमा मतदानको अवसर पाउने अनौपचारिक समझदारी बनेको थियो। यसको उद्देश्य नेतृत्वलाई छल्दै तीन वर्षका लागि ‘एसीए’ कर छुट विस्तार गर्ने विधेयकमाथि सिधै सदनमा मतदान गराउनु हो।
मध्यमार्गी रिपब्लिकनहरूले आफ्ना सिनेट समकक्षीसँग द्विदलीय सम्झौता विधेयकका विकल्पबारे छलफल गरिरहेका छन्। दुवै सदनबाट विधेयक पारित हुन सकोस् भन्ने यस छलफलको मुख्य उद्देश्य रहेको छ।
यी वार्तामा संलग्न सांसदहरूले आगामी जनवरी ३० को सरकारी बजेटको म्यादअघि नै कुनै नयाँ प्रस्ताव ल्याउने आशा विश्लेषकहरूले गरेका छन्।