अष्ट्रेलियाको समुद्री तटमा भाग्यवस बाँचे यी व्यक्ति: उनी डुब्दै थिए, श्रीमती किनारबाट रुँदै गुहार माग्दै थिइन्
प्रकाशित मिति : पुस १६, २०७५ सोमबार
अष्ट्रेलियामा गर्मी मौसम सुरु भएसंगै समुद्रमा डुबेर जीवन गुमाएको बारेमा समाचारहरु आउन थाल्छन् । नेपाली विद्यार्थीका समेत यस्तै दुखद खबरहरु सुन्नुपर्छ ।
एक भारतीय भने समुद्रमा डुब्दा डुब्दै भाग्यवस बाँचेका छन् । प्रितेश पटेल नाम गरेका ती व्यक्ति श्रीमती र छोरा संगै सन्साइन कोस्ट समुद्री किनारमा गएका थिए । परिवारसंग छुट्टी मनाउन गएका उनी पानीसंग खेल्दा खेल्दै पर पुगे । त्यसपछि समुद्रको छालले उनलाई लडायो । उनी डुब्दै थिए, मृत्यु संग लड्दै थिए । यता समुद्र किनारबाट उनकी श्रीमती रुँदै, चिच्याउदै गुहार माग्दै थिइन् । छोरा अत्तालिएर रोइरहेका थिए ।
गुहार मागेको सुनेपछि समुद्री किनारमा जाने व्यक्तिहरु उनीहरु नजिक आए । चार जना मिलेर पटेललाई बचाउन सफल भए । बचाउनको लागि उनीहरुले विभिन्न जुक्ति तथा समुद्री यान प्रयोग गरेका थिए ।
३० वर्षीय पटेल समुद्रमा जाँदा त्यहाँ संकेतको लागि राखिएका झण्डाबाट बाहिर गएका थिए । आफूले त्यो संकेतलाई नमान्दा मृत्युको मुखसम्म पुगेको स्वीकार्दै उनले नियमको पालना गर्न, संकेतको ख्याल गर्न र सतर्क रहन सबैलाई आग्रह गरेका छन् । उनले आफूहरुलाई बचाउने ती व्यक्तिहरुप्रति कृतज्ञ रहेको समेत बताएका छन् ।
Himalayan Kangaroo