अप्रिलदेखि विदेशी कामदार ल्याउने नयाँ बिधेयक संसदबाट पारित
प्रकाशित मिति : मंसिर २३, २०७५ आईतबार
जापानको उपल्लो सदनबाट विदेशी कामदार भित्राउने सम्बन्धि बिधेयक पारित भएको छ । चरम श्रमिक अभावको चपेटामा आएका औद्योगिक क्षेत्रमा कामदार ल्याउने सम्बन्धि विधेयक पारित भएसंगै विदेशी कामदार भित्राउन आधिकारिक बाटो खुलेको छ । यस योजनाले विस्तृत विवरण र काम गर्ने सहि वातावरण सुनिश्चित गर्दैन कि भन्ने जस्ता विवादको सामना गरिरहेको भएपनि बिधेयक पास भएकाले यो जापानी उद्योगहरुका लागि कोशेढुंगा साबित हुन सक्ने विश्लेषण गरिएको छ ।
यसअघि जापानले चिकित्सक, वकिल र शिक्षकजस्ता उच्च व्यावसायिक ज्ञान र कौशल भएका व्यक्तिहरुलाई मात्रै भिसा दिँदै आएको भएपनि आगामी अप्रिलबाट विदेशी कामदारका लागि नयाँ भिसा प्रणाली कार्यान्वयमा आउने बताइएको छ । निर्माण, कृषि, नर्सिंग केयर जस्ता १४ ओटा विभिन्न क्षेत्रमा विदेशी अर्धदक्ष कामदार हरु समेत भित्राउने लक्ष्य छ ।
विपक्षि दलका सांसदहरुले विरोध गरेपनि बिधेयक पारितभएसंगै आगामी अप्रिलदेखि दुई प्रकारको नयाँ भिषा कार्यान्वयनमा आउनेछन् । विपक्षी दलहरुको विरोधका वावजुदपनि तल्लो सदनबाट पारित भई विधेयक उपल्लो सदनमा छलफलका लागि पुगेको थियो ।
बिधेयक पारित भएको घोषणा गर्ने क्रममा बिपक्षि दलका सांसदहरुले बिरोध गर्दा संसदमा घम्साघम्सी समेत परेको थियो ।
पहिलो प्रकारको भिसामा कम दक्षता भएका कामदारहरु जापानी कम्पनीहरुको माग अनुसार निश्चित सिप तथा भाषागत ज्ञानपछि जापान आउन पाउनेछन् । यस्ता कामदारले ५ बर्षको भिषा पाएपनि परिवारका सदस्य भने ल्याउन नपाउने बताईएको छ । तर परिवारसंग साथमा रहन पाउनुपर्ने नीति अबलम्बन गर्नका कानूनविद् तथा अधिकारकर्मीहरुको दवाव समेत सरकारलाई छ ।
यसैगरि दोस्रो भिषा अनुसार दक्ष कामदारहरु आउने छन् । उनीहरुले सुरुमा पाँचबर्षे भिषा सहित परिवारका सदस्य ल्याउन पाउनुका साथै लामो अवधिसम्म जापान रहन पाउने सहज अनुमति पाउने बताईएको छ । तर तयारी चरणमै रहेकाले यस सम्बन्धमा थप जानकारी सार्वजनिक गरिएको छैन ।
जापानको बढ्दो वृद्ध जनसंख्या र घट्दो जन्मदरका कारण केही क्षेत्रमा कामदारको चरम अभाव देखिएको छ । हालसम्म यस प्रकृयाअन्तर्गत कुन देशबाट कति कामदार ल्याउने भन्नेबारेको कुनै जानकारी सार्वजसनिक गरिएको छैन । विधेयक पारित भएसंगै सरकारले सम्बन्धित मन्त्रालय र अधिकारीहरुसंग परामर्श गरेर थप कुराको टुङ्गो लगाउनेछ ।