Follow @khasokhasmag

युरोपेली युनियन ब्रेक्जिट सम्झौता अनुमोदन गर्न सहमत


प्रकाशित मिति : मंसिर ९, २०७५ आईतबार

युरोपेली युनियनमा आवद्ध २७ देशका नेताहरुले बेलायती बहिर्गमनसहितको ब्रेक्जिट सम्झौतालाई अनुमोदन गर्ने भएका छन् ।
ब्रेक्जिट सम्झौतालाई अनुमोदन गर्न युरोपेली युनियनमा आवद्ध २७ देशका नेताहरुले आइतबार बेलायती प्रस्तावको सम्बन्धमा हस्ताक्षर गर्ने अन्तर्राष्ट्रिय सञ्चारमाध्यमहरुले जनाएका छन् । हस्ताक्षर लगत्तै बेलायती प्रधानमन्त्री मे पनि सम्मेलनमा सहभागी हुने जनाइएको छ ।

१७ महिनादेखिको बहस पश्चात तयार पारिएको सम्झौताले वित्तीय विषयहरु, नागरिकको अधिकार, उत्तरी आयरल्यान्ड र सङ्क्रमण व्यवस्थालाई समेटेको छ । साथै, सम्झौताले युरोपको भावी सुरक्षा र व्यापारिक सम्बन्धका बारेमा पनि मार्गनिर्देशन गर्ने अपेक्षा गरिएको छ । सम्झौतामा हस्ताक्षर गरेपनि बेलायत युरोपियन युनियनबाट बाहिरने कुराको टुङ्गो लाग्न भने अझै केहि समय लाग्नेछ ।

बेलायती संसद हाउस अफ कमन्स ले आगामी मार्च २९ अघि सम्झौतालाई अनुमोदन गरेपछि मात्र बेलायत पूर्ण रुपमा युरोपियन युनियनबाट बाहिरिने छ । बेलायती बहिर्गमनको विपक्षमा रहेका युरोपेली युनियनका परिषद् अध्यक्ष डोनाल्ड टस्कले सम्मेलनको पूर्वसन्ध्यामा वक्तव्य दिदै बेलायतको बहिर्गमन योजनाबाट कोही पनि खुशी नरहेको प्रतिक्रिया दिएका छन् ।

प्रधानमन्त्री मेको कन्जरभेटिभ पार्टी र त्यसको समर्थक नर्दन आइरिस पार्टीले सम्झौताप्रति समर्थन नगर्ने जनाएका छन् भने विषक्षी सांसदहरुले पनि आलोचना गरिरहेका छन् । मेले आइतबार देशलाई सम्बोधन गर्दै जारी गरेको खुला पत्रमा सन २०१६ को जनमतसङ्ग्रहले युरोपेली युनियनबाट बेलायतको बहिर्गमनलाई स्वीकृति दिइसकेको बताउँदै प्रस्तावित ब्रेक्जिट सम्झौता मुलुकको सुन्दर भविष्यका लागि भएको बताएकी छन् ।

ब्रेक्जिटको निर्णयप्रति बेलायती जनमत निकै विभाजित भएपनि प्रधानमन्त्री मेले बहिर्गमनको प्रयासले अन्तिम रुप लिइसकेको र यसबाट बेलायतलाई फाइदा नै पुग्ने जनाएकी छन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com