जापानमा ताइफुबाट एकको मृत्यु, यसरी उडायो गाडि र घर
प्रकाशित मिति : भाद्र १९, २०७५ मंगलबार
जापानमा मङ्गलवार आएको शक्तिशाली आँधीबाट एक जनाको ज्यान गएको छ भने यसले जापानी जनजीवन अस्तव्यस्त बनाइदिएको छ । जेबी नाम दिइएको सो आँधी प्रतिघण्टा २ सय १६ किलोमिटरको गतिमा आएको मौसमविद्हरुले बताएका छन् ।
भारी वर्षासहितको आँधीको प्रकोपका कारण पश्चिमी जापानमा अधिकांश स्थानमा पहिरो गएको छ भने यातायात पनि ठप्प रहेको छ । उद्धार कार्यमा खट्न सबैलाई आग्रह गर्दै प्रधानमन्त्री सिञ्जो आवेले सतर्कता अपनाउन नागरिकलाई आग्रह समेत गरेका छन् ।
खतरनाक हावाहुरीको सम्भावना अझै रहेकाले आवश्यक सतर्कता अपनाउन सूचना जारी गरिएको हो । सोमवार साँझबाट शुरु भएको आँधीको प्रकोप २५ वर्षपछिकै शक्तिशाली रहेको र मङ्गलवार अाँधीको गति झनै बढेको बताइएको छ । यसैकारण नागरिकलाई अनावश्यक रुपमा बाहिर ननिस्कन र सरकारी सूचनाहरुलाई मनन गर्न मौसमविद्हरुले सुझाएका छन् । आँधीका कारण कन्साई अन्तरराष्ट्रिय विमानस्थल बन्द भएको थियो । आँधीका कारण किन्की क्षेत्रका हवाई उडान र रेलवे सेवा रद्ध गरिएको छ भने कारखाना तथा युनिभर्सल स्टुडियोज जापान लगायतका क्षेत्रहरु पनि बन्द भएका छन् । क्योतो स्टेशनमा शक्तिशाली हावाहुरीका कारण सिसाको छानो उडाउँदा केही मानिस घाइते भएको बताइएको छ ।
हावाहुरीका कारण पश्चिम जापानमा केही ट्रकहरु राजमार्गमै पल्टिएको प्रहरीको बताएको छ । त्यस्तै कन्साइ विमास्थल र ओशाका प्रिफेक्चरको शहर इजुमिसानोलाई जोड्ने पुलनजिक एक ट्याङ्कर अनियन्त्रित भइ पल्टिदाँ टयाङ्कर र पुल क्षतिग्रस्त भएको भएपनि यात्रुहरु भने सकुशल रहेको बताइएको छ ।
विमानस्थलको रनवे र टर्मिनलमा बाढी पसेका कारण अवस्था गम्भीर बनेको स्थानीय अधिकारीले बताएका छन् । ओशाका बन्दरगाहमा दर्जनौं जहाजहरु बाढीले बगेको तर क्रु सदस्यहरु भने सकुशल रहेको जानकारी आएको छ ।
पश्चिम जापानमा आएको यस आँधीले यातायात सिष्टम र व्यवसायहरु प्रभावित बनेको छ ।
http://beingnp.com/wp-content/uploads/2018/09/Vid.mp4?_=1