क्यानाडामा एक्सप्रेस इन्ट्रीमार्फत पीआरका लागि देखाउनुपर्ने बैंक ब्यालेन्स बृद्धि
प्रकाशित मिति : जेष्ठ ३०, २०८१ बुधबार
क्यानडाले एक्सप्रेस इन्ट्रीमार्फत पीआरका लागि देखाउनुपर्ने बैंक ब्यालेन्स बृद्धि गरेको छ । क्यानडाको अध्यागमन एजेन्सी आईआरसीसीले एक्सप्रेस ईन्ट्रीमार्फत संघीय दक्ष कामदार र संघीय दक्ष ट्रेड कार्यक्रम मार्फत स्थायी बसोबासको लागि आवेदन गर्ने विदेशी नागरिकहरूलाई आवश्यक पर्ने नयाँ न्यूनतम रकम लागु गरेको हो ।
न्यूनतम रकमहरू सामान्यतया वार्षिक रूपमा अद्यावधिक गरिदै आएको छ । यो रकम परिवारको आकारमा निर्भर हुन्छ । उदाहरणका लागि एकजनाको परिवारका लागि अब न्यूनतम १४ हजार ६ सय ९० क्यानेडियन डलर फण्ड आवश्यक पर्नेछ । यस अगाडि यो रकम १३ हजार ७ सय ५७ क्यानेडियन डल रहदै आएको थियो । त्यस्तै २ जनाको परिवारका लागि १८ हजार २ सय ८८ डलर आवश्यक पर्नेछ । यस अगाडि यो रकम १७ हजार १ सय २७ रहेको थियो ।
त्यस्तै तीनजनाको परिवारका लागि २२ हजार ४ सय ८३ डलर आवश्यक पर्नेछ, यो रकम यस अगाडि २१ हजार ५५ रहेको थियो । ४ जनाको परिवारका लागि अब २७ हजार २ सय ९७, पाँचजनाको परिवारका लागि ३० हजार ६ सय ९० आवश्यक पर्नेछ । ६ जनाको परिवारका लागि ३४ हजार ९ सय १७ र सातजनाको परिवारका लागि ३८ हजार ८ सय ७५ डलर चाहिनेछ । त्यसपछि हरेक एकजना परिवारको संख्या बढ्दै जाँदा ३ हजार ९ सय ५८ डलर थप्दै जानुपर्छ ।
यी कार्यक्रमहरुमार्फत आवेदन दिने आवेदकको बैंक वा बित्तिय संस्थामा उक्त रकम तयारी अवस्थामा हुनुपर्छ । आवेदनको बेला र पीआर भिसा जारी हुने बेलामा समेत यो रकम बैंकमा हुन आवश्यक छ । क्यानेडियन अनुभव श्रेणी अन्तर्गत आवेदन दिने विदेशी नागरिकहरू वा क्यानाडामा काम गर्न योग्य भएका तथा जागिरको अफर भएकाहरुलाई भने बैंक ब्यालेन्स देखाउन आवश्यक हुँदैन ।
परिवारको संख्या गणना गर्दा आफू, दम्पत्ति वा कानूनी पार्टनर, आश्रित छोराछोरी, दम्पत्तिका आश्रित छोराछोरीको सबैको गणना गर्नुपर्छ । दम्पत्ति वा कानूनी पार्टनर, आश्रित छोराछोरी, दम्पत्तिका आश्रित छोराछोरीहरु तपाईसँग क्यानडा नआउने भएतापनि वा उनीहरु क्यानडाका नागरिक वा स्थायी बासिन्दा भएतापनि उनीहरुको गणना गर्नुपर्छ । यो रकम देखाउँदा अरुबाट उधारो ल्याएर देखाउन नपाइने नियम रहेको छ ।
क्यानडा आउँदा सकेजति रकम ल्याउन सरकारले सुझाव दिएको छ । किनभने यसले क्यानाडामा घर सर्न र खोज्न सजिलो बनाउनेछ। तर क्यानाडामा आउँदा १० हजार डलर भन्दा बढी रकम ल्याइरहनुभएको छ भने सीमा अधिकारीलाई बताउनुपर्छ। यदि तपाईंले सीमा अधिकारीलाई नबताएमा तपाईंलाई जरिवाना लाग्न सक्छ र तपाईंको रकम जफत पनि हुन सक्छ।