सह-महामन्त्री यादवमाथि धारिलो हतियारले आक्रमण गर्ने को हुन ? कांग्रेसले के भन्यो ?
प्रकाशित मिति : भाद्र २०, २०८० बुधबार
नेपाली कांग्रेसका सहमहामन्त्री महेन्द्र यादवमाथि काठमाडौँमा धारिलो हतियारले आक्रमण भएको छ । काठमाडौँको भृकुटीमण्डपस्थित रिपोर्टर्स् क्लबको कार्यक्रमबाट बाहिरिएका यादव गाडी चढ्न लाग्दा धारिलो हतियार प्रहार भएको जिल्ला प्रहरी परिसर काठमाडौँले जनाएको छ ।
प्रहरीका अनुसार आक्रमण गर्ने नुवाकोटाको विदुर नगरपालिका–७ बस्ने ४७ वर्षीय श्याम सापकोटालाई आक्रमणमा प्रयोग भएको हतियारसहित प्रहरीले नियन्त्रणमा लिएको छ । धारिलो हतियारबाट यादवको टाउकाको पछाडिको भागमामा गहिरो चोट लागेको छ ।
यादवको ट्रमा सेन्टरमा उपचार भइरहेको छ । कांग्रेस सहमहामन्त्री यादवमाथि आक्रमण गर्ने व्यक्ति राजावादी भएको पनि खुलेको छ । आक्रमणपछि उनले राजतन्त्रको पक्षमा नाराबाजी गरेका थिए । साथै उनले एमसीसी खारेज गर, हिन्दू राष्ट्र कायम गर, राजसंस्था जिन्दावाद जस्ता नारा लगाएका थिए ।
रिपोटर्स क्लबले यादवसहितका नेताहरुसँग सुन तस्करी प्रकरण, मुलुकमा बढ्दो भ्रष्टाचारलगायतका विषयमा साक्षात्कार गरेको थियो । साक्षात्कारमा करिब २५ मिनेट सम्बोधन गरेका यादव त्यसपछि राप्रपाका महामन्त्री डा धवलशमशेर राणासँगै बाहिरिएका थिए । आक्रमणकारीले राजतन्त्रको पक्षमा नारा लगाएकोले यो अक्रमण राजनीतिक स्वार्थप्रेरित रहेको नेविसंघका सभापति दुजाङ शेर्पाले बताए । घटनाको निष्पक्ष छानविन गरेर दोषिलाई कारबाही नभए सडक संघर्षमा जाने उनले चेतावनी दिए ।
आक्रमणकारी सापकोटा कार्यक्रम अवधिभर क्लबभित्रै अघिल्लो लहरमा न बसेर भाषण सुनेका थिए । क्लबबाट यादव बाहिरिएसँगै उनले यादवको पिछा गर्दै एकाएक आक्रमण गरेका थिए । सापकोटालाई नियन्त्रणमा लिएर प्रहरीले अनुसन्धान अघि बढाएको छ ।
नेपाली कांग्रेसले पार्टी सह–महामन्त्री महेन्द्र यादव माथि भएको सांघातिक हमलालाई गम्भीरतापूर्वक लिएको छ । सहमहामन्त्री माथिकोको आक्रमणको कांग्रेसले घोर निन्दा र भत्र्सना गरेको छ । कांग्रेसका मुख्यसचिव कृष्णप्रसाद पौडेलले यादवमाथि आक्रमण गर्नेलाई गहिरो अनुसन्धान गरेर कारबाही गर्न सरकारसमक्ष आग्रह गरेका छन् ।