गतमहिना १०३३ नेपालीलाई अमेरिकाको भिसा, आप्रवासी भिसा पाउनेमात्र ४३७
प्रकाशित मिति : फाल्गुन १२, २०७७ बुधबार
आप्रवासन रोक र महामारी बीच पनि गतमहिना अर्थात् जनवरी २०२१ मा ४३७ नेपालीहरुले अमेरिकाको आप्रवासी भिसा प्राप्त गरेका छन् । जसमध्ये सबैभन्दा धेरै अमेरिकी नागरिकका नेपाली दम्पत्तिहरु ३७३ जनाले भिसा प्राप्त गरेका छन् ।
त्यस्तै अमेरिकी नागरिकका छोराछोरीहरु र बुबाआमाहरु २८ जना नेपालीहरुले जनवरीमा अमेरिकाको आप्रवासी भिसा पाएका छन् । काठमाडौंमा रहेको अमेरिकी दूतावासलेमात्र जनवरीमा ४३६ जनालाई अमेरिकाको आप्रवासी भिसा जारी गरेको अमेरिकी सरकारको विदेश मन्त्रालयले ब्यूरो अफ कन्सुलर अफेयर्सले जनाएको छ ।
त्यस्तै अमेरिकी दूतावास काठमाडौंले जनवरीमा ४३० जनालाई भिजिटर लगायतका गैरआप्रवासी भिसा जारी गरेको छ । जनवरीमा काठमाडौं दूतावासबाट भिजिटर भिसा पाउनेहरु ४१२ जना रहेका छन् । उनीहरु प्राय विगतको भिजिटर भिसा नविकरण गर्नेहरु हुन् । त्यो बाहेक एकजना विद्यार्थी भिसा र ३ जनाले मंगेतर भिसा प्राप्त गरेका छन् ।
बाइडेनले आप्रवासन रोक खारेज गरेपछि भिसा कुरेकाहरु र डिभी विजेताले चाल्नुपर्ने कदम
जनवरीमा दिल्लीमा रहेको अमेरिकी दूतावासमार्फत अमेरिकाको विद्यार्थी भिसा लिने नेपालीहरुको संख्या भने उल्लेख्य रहेको छ । काठमाडौंमा रहेको अमेरिकी दूतावासले एकजनालाईमात्र विद्यार्थी भिसा जारी गरेपनि जनवरीमा विद्यार्थी भिसा पाउने नेपालीहरुको कुल संख्या भने १ सय ११ रहेको छ । उनीहरुका ५ जना डिपेण्डेण्टहरुले समेत भिसा पाएका छन् ।
परिवार, रोजगार र डिभीमा आधारित आप्रवासी भिसामाथिको रोक बाइडेनबाट खारेज
जनवरीमा काठमाडौं लगायत अन्य दूतावास र कन्सुलेटबाट अमेरिकाको गैरआप्रवासी भिसा पाउने नेपालीहरुको संख्या ५९६ रहेको छ । यसरी जनवरीमा कुल १०३३ नेपालीहरुले अमेरिकाको आप्रवासी र गैरआप्रवासी भिसा प्राप्त गरेका छन् ।