परिवार, रोजगार र डिभीमा आधारित आप्रवासी भिसामाथिको रोक बाइडेनबाट खारेज
प्रकाशित मिति : फाल्गुन १२, २०७७ बुधबार
अमेरिकी राष्ट्रपति जो बाइडेनले डिभी विजेता लगायतमाथि डोनाल्ड ट्रम्पले मार्च ३१ सम्मका लागि लगाएको आप्रवासन रोक खारेज गरेका छन् । बाइडेनको यो कदमपछि अब डिभी लोटरी लगायत परिवारमा आधारित र रोजगारमा आधारित आप्रवासी भिसामा अमेरिका आउनबाट रोकिएकाहरु अब अमेरिका आउन पाउने भएका छन् ।
बाइडेनले आज एक कार्यकारी आदेश जारी गरेर ट्रम्पले जारी गरेको कार्यकारी आदेश १००१४ लाई उल्टाएका हुन् । ट्रम्पको आप्रवासन रोकका कारण अमेरिकी ग्रिनकार्ड वाहकका दम्पत्ति र छोराछोरीहरु लगायत परिवारमा आधारित अन्य कैयन श्रेणीका आप्रवासीहरु पनि अमेरिका आउन पाएका थिएनन् ।
तर अब अमेरिकी नागरिकका दम्पत्ति, २१ बर्ष मुनीका छोराछोरीबाहेकका अन्य परिवारका सदस्यहरु र ग्रिनकार्डवाहकका परिवारका सदस्यहरु पनि अमेरिका आउन पाउने भएका छन् । अमेरिकी नागरिकका मंगेतर, दम्पत्ति, २१ बर्ष मुनीका छोराछोरीलाई भने ट्रम्पको कार्यकारी आदेशले रोक लगाएको थिएन ।
कामदार भिसा एचवान बी लगायतमाथिको रोक भने बाइडेनले हटाएका छैनन् । विभिन्न प्रकारका कामदार भिसाहरुमाथि रोक मार्च अन्तिम सम्म नै कायम रहने भएको छ ।
बाइडेनको कार्यकारी आदेशको पूर्ण पाठ
बाइडेनले आप्रवासन रोक खारेज गरेपछि भिसा कुरेकाहरु र डिभी विजेताले चाल्नुपर्ने कदम
ट्रम्पले कार्यकारी आदेशमार्फत सन् २०२० को भिसाको औचित्य समाप्त गरेकोमा संघीय अदालतले त्यसको बिरुद्धमा फैसला गरेपछि सेप्टेम्बरमा सयौ नेपालीहरुले डाइभर्सिटी भिसा प्राप्त गरेका थिए । तर उनीहरु अमेरिका आउन पाएका थिएनन् । अब उनीहरु पनि आउन पाउने भएका छन् ।
युएस डिस्ट्रिक्ट कोर्ट वासिंटन डिसीका न्यायाधिस अमित मेहताले सन् २०२० का डिभी विजेताहरुलाई भिसा जारी गर्न आदेश दिएपछि सेप्टेम्बरको दोश्रो सातादेखि डिभी विजेताहरुलाई भिसा जारी गर्न सुरु गरिएको थियो । उनीहरुले सेप्टेम्बरको अन्त्यसम्म भिसा पाएका थिए ।
अदालतको आदेशपछि डाइभर्सिटी भिसा प्राप्त गर्न सफल नेपालीहरु ४०४ जना रहेको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । जसमध्ये २२५ जना प्राथमिक डिभी विजेता नेपाली रहेका थिए भने १०५ जना उनीहरुका दम्पत्ति थिए । त्यस्तै ७४ जना उनीहरुका छोराछोरीहरु रहेका थिए ।
काठमाडौंमा रहेको अमेरिकी दूतावासलेमात्र सेप्टेम्बरमा ३७९ जना डिभी विजेताहरुलाई भिसा जारी गरेको थियो । जसमध्ये २१२ जना प्राथमिक डिभी विजेताहरु, ९५ जना उनीहरुका दम्पत्ति र ७२ जना उनीहरुका छोराछोरीहरु रहेका थिए । अदालतको आदेशपछि आफूहरुले सकेजतिलाई भिसा जारी गरेको काठमाडौंस्थीत नेपाली दूतावासले जनाएको थियो ।
सन् २०२० का लागि ३६९६ जना नेपालीहरुले डिभी लोटरी पारेका थिए । तर उनीहरुमध्ये झण्डै साढे १३ सय जना प्राथमिक डिभी विजेताहरुलेमात्र अमेरिकाको भिसा प्राप्त गर्न सफल भए ।
सन् २०२१ का लागि डिभी विजेता नेपालीहरुको संख्या भने ३८०१ रहेको छ । सन् २०२१ का डिभी लोटरी पारेकाहरुले आगामी अक्टोबर १ देखि भिसा पाउन सुरु गर्ने नियम भएपनि भिसा पाउनमा ढिलो भएको छ । तर अब भने उनीहरुले पनि भिसा पाउने भएका छन् ।
सन् २०२१ का डिभी विजेताहरुमा नेपाल एसियामा दोश्रो भएको छ । सबैभन्दा धेरै डिभी विजेताहरु इरानका ६ हजार १ जना रहेका छन् । सन् २०२१ का लागि विश्वमै सबैभन्दा धेरै डिभी विजेताहरु भने इजिप्टका ६ हजार २ जना रहेका छन् । त्यस्तै अल्जेरियाका ६ हजार १ जना र सुडानका ६ हजार १ जना रहेका छन् ।
आर्थिक बर्ष २०२२ का गत अक्टोबर ७ देखि डिभीका लागि आवेदन खुलेकोमा नोभेम्बर १० सम्म डिभी लोटरी भरिएको थियो । यो डिभीको नतिजा भने सन् २०२१ को मे ८ मा सार्वजनिक हुनेछ ।