भोलिदेखि शुक्रबारसम्म हरेक दिन कार्यकारी आदेश जारी गर्दै बाइडेन, अध्यागमनलाई शुक्रबार
प्रकाशित मिति : माघ ११, २०७७ आईतबार
अमेरिकी राष्ट्रपति जो बाइडेनले भोलि सोमबारदेखि शुक्रबारसम्म हरेक दिन कार्यकारी आदेश जारी गर्ने भएका छन् । हरेक दिनका लागि कार्यकारी आदेश जारी गर्नका लागि फरक फरक विषय छुट्याइएको छ ।
२७ वटा कार्यकारी आदेश जारी गरिसकेका बाइडेनले सोमबार अमेरिकन उत्पादनलाई प्रोत्साहन गर्ने कार्यकारी आदेश जारी गर्नेछन् । बाइडेनले अमेरिकन एजेन्सीहरुलाई आफ्ना सामान र सेवा अमेरिकी कामदार र विजनेशबाट लिनुपर्ने प्रावधान लागु गराउन सोमबार कार्यकारी आदेश जारी गर्ने अपेक्षा गरिएको छ ।
मंगलबार बाइडेनले जातीय समानताका सन्र्दभमा कार्यकारी आदेश जारी गर्ने जनाइएको छ । त्यस्तै बाइडेनले मंगलबार जेलको अवस्था सुधारका लागि र प्राइभेट जेलहरु बन्द गराउने प्रकृयाको सुरुवातका लागि कार्यकारी आदेश जारी गर्ने अपेक्षा गरिएको छ ।
एसियन अमेरिकन र प्यासेफिक आइल्याण्डरमाथि आवासमा हुने गरेको विभेद अन्त्यका लागि पनि मंगलबार बाइडेनको कार्यकारी आदेश जारी गर्ने जनाइएको छ । त्यस्तै तेश्रो लिंगीलाई सेनामा सेवा गर्नका लागि लगाइएको रोक पनि बाइडेनले उल्टाउने अपेक्षा गरिएको छ ।
बाइडेनबाट १० वटा कार्यकारी आदेश जारी, युद्धको बेलामा सकृय बनाइने ऐनको प्रयोग
बुधबार बाइडेनले जलवायु परिवर्तनबारेका कार्यकारी आदेश जारी गर्नेछन् । जलवायु परिवर्तनलाई राष्ट्रिय सुरक्षा प्राथमिकताका रुपमा स्तरोन्नती गर्ने तथा घरेलु रुपमा जलवायु परिवर्तनबिरुद्ध लड्ने विभिन्न कदमहरु बाइडेनले चाल्ने अपेक्षा गरिएको छ ।
बिहिबार हेल्थकेयरबारेका कार्यकारी आदेश जारी गर्ने अपेक्षा गरिएको छ । ट्रम्पले गर्भपतनसम्बन्धि काम गर्ने संस्थाहरुलाई अमेरिकी सहायतारकम उपलब्ध नगराउने नीति ल्याएकोमा बाइडेनले त्यसलाई उल्टाउने अपेक्षा गरिएको छ । बाइडेनले मेडिकेडलाई सुदृढ गर्ने लगायतका कार्यकारी आदेश जारी गर्ने जनाइएको छ ।
बाइडेनबाट फुड स्ट्याम्पको सुविधा बढाउने र तलबबृद्धि गर्ने कार्यकारी आदेश जारी
शुक्रबार बाइडेनले अध्यामगनबारेका कार्यकारी आदेशहरु जारी गर्ने जनाइएको छ । बाइडेनले केही एसाइलम सम्बन्धि कार्यकारी आदेश जारी गर्नेछन् भने ट्रम्प कार्यकालमा विछोडिएका परिवारको पुनर्मिलनका लागि टास्क फोर्स समेत बनाउने अपेक्षा गरिएको छ ।
नागरिकताको प्रकृयाको पुनरावलोकन र पब्लिक चार्जको नियमको पुनरावलोकनका सन्दर्भमा पनि बाइडेनले शुक्रबार नै कार्यकारी आदेश जारी गर्ने अपेक्षा गरिएको छ । शुक्रबार नै शरणार्थी सम्बन्धि कार्यकारी आदेश जारी गर्ने बताइएपनि उक्त आदेश भने अर्को साताका लागि समेत पछि सार्न सकिने जनाइएको छ ।
बाइडेनका १७ कदममा ५ अध्यागमनबारे: यात्रा प्रतिबन्ध खारेज, अध्यागमन कारवाहीमा रोक