विश्व स्वास्थ्य संगठन आवद्ध भ्याक्सिन वितरण र विकाश प्रयासमा अमेरिका सहभागी नहुने
प्रकाशित मिति : भाद्र १७, २०७७ बुधबार
विश्व स्वास्थ्य संगठन आवद्ध कोरानाबिरुद्धका भ्याक्सिन वितरण र विकाश प्रयासमा सहभागी नहुने अमेरिकाले घोषणा गरको छ । अहिले कोरोनाबिरुद्धको भ्याक्सिन विकाश, निर्माण र वितरणका विश्वब्यापी प्रयासमा विश्व स्वास्थ्य संगठनसमेत आवद्ध रहेकाले आफूहरु त्यसमा सहभागी नहुने ट्रम्प प्रशासनले निर्णय गरेको हो ।
विश्वका १७० भन्दा धेरै देशहरु विश्व स्वास्थ्य संगठन आवद्ध विश्वब्यापी कार्यक्रम कोभ्याक्समा सहभागी हुन छलफल गरिरहेका छन् । जसले कोरोनाबिरुद्धको भ्याक्सिनलाई गति दिने, सबै देशका लागि भ्याक्सिन सुरक्षित गराउने र वितरण गर्ने लक्ष्य लिएको छ । यो योजनाको सह नेतृत्व विश्व स्वास्थ्य संगठनले गरिरहेको छ ।
ह्वाइटहाउसले विश्व स्वास्थ्य संगठनसँग काम गर्न नचाहेका कारण अमेरिकाले यो प्रयासमा सहभागिता नजनाउने भएको छ । अमेरिकी राष्ट्रपति डोनाल्ड ट्रम्पले विश्व स्वास्थ्य संगठनको प्रतिकृया चीन केन्द्रीत रहेको भन्दै सुरुदेखि नै विरोध जनाउँदै आएका छन् ।
ह्वाइटहाउसका एकजना प्रवक्ताले कोरोनाबिरुद्धको लडाईमा अमेरिकाले विश्वभर रहेका अन्तर्राष्ट्रिय पार्टनरहरुसँग निरन्तर काम गर्ने तर भ्रष्ट विश्व स्वास्थ्य संगठन र चीनबाट प्रभावित बहुपक्षीय संस्थाहरुसँग काम नगर्ने बताएका छन् । अमेरिकाको यो निर्णयले अमेरिकाको स्वास्थ्य कुटनीतिमा नयाँ स्वरुप आउनसक्ने अनुमान गरिएको छ ।
अमेरिकाले औषधी कम्पनीहरुसँग अन्य दुईपक्षीय सहमतिहरु कायम गर्दै अगाडि बढ्नुका साथै कोभ्याक्समा सहभागिता पनि छाड्न नहुने कतिपय विज्ञहरुले सुझाव दिएका छन् । कोभ्यास स्थापनाका पछाडि हरेक देशमा रहेका उच्च जोखिमपूर्ण जनसंख्यालाई कोरोनाबिरुद्धको भ्याक्सिन उपलब्ध गराउने लक्ष्य समेत रहेको छ ।
उक्त प्रयासमा अमेरिका सहभागी नभएमा कठिन अवस्था आउनसक्ने जनाइएको छ । ट्रम्प प्रशासनका केही सदस्यहरु कोभ्याक्स प्रयासमा समेत सहभागी हुनेमा सकारात्मक देखिएका थिए । तर अन्तत अमेरिकाले यसमा सहभागी नहुने निर्णय गरेको छ ।
गत अप्रिलमा राष्ट्रपति ट्रम्पले विश्व स्वास्थ्य संगठनलाई नयाँ डोनेशन रकम रोकेका थिए । त्यसपछि जुलाईमा विश्व स्वास्थ्य संगठनबाट अलग हुने आशयको पत्र पठाइएको थियो ।
