अमेरीकी राष्ट्रिय सुरक्षासम्बन्धी गोप्य सूचना चीन पठाएको अभियोगमा पूर्व अमेरिकी सैनिक दोषी ठहर
Photo: Sasun Bughdaryan/Unsplash
अमेरिकाको ओरेगन राज्यस्थित हिल्सबरो निवासी ४१ वर्षीय पूर्व अमेरिकी सैनिक रुओयु दुआनले राष्ट्रिय रक्षा सूचना सङ्कलन तथा हस्तान्तरण गर्ने षड्यन्त्रमा आफ्नो दोष स्वीकार गरेका छन्। डिस्ट्रिक्ट अफ ओरेगनका लागि अमेरिकी सरकारी वकील स्कट ई. ब्राडफोर्डले दुआनले अदालतसमक्ष आफ्नो अपराध स्वीकार गरेको घोषणा गरे।
अदालतको दस्तावेज अनुसार, नोभेम्बर २०२१ देखि मार्च २०२५ को बीचमा दुआनले अन्य व्यक्तिहरूसँग मिलेर अमेरिकी सेनाको कार्यक्षमता, कम्प्युटर उपकरण, तालिम सामग्री, गुप्तचर रिपोर्ट र प्राविधिक निर्देशिकाहरू जस्ता संवेदनशील सैन्य सूचनाहरू गुप्त रूपमा सङ्कलन गर्ने षड्यन्त्र रचेका थिए। उनले बहालवाला अमेरिकी सैनिकहरू तथा अन्य व्यक्तिहरूलाई पैसा दिएर ब्राड्ली, स्ट्राइकर र हाइमार्स जस्ता अमेरिकी सैन्य वाहन एवं हातहतियार प्रणालीसँग सम्बन्धित विवरणहरू प्राप्त गरी चीनमा रहेका मानिसहरूलाई पठाएका थिए।
दुआनले सन् २०१३ देखि २०१७ सम्म अमेरिकी सेनामा सेवा गरेका थिए, जहाँ उनले संवेदनशील र वर्गीकृत सैन्य सूचनाहरू व्यवस्थापन गर्ने तालिम प्राप्त गरेका थिए।
यसअघि, ५ मार्च २०२५ मा पोर्टल्याण्डको एक फेडरल ग्रान्ड जुरीले दुआन र बहालवाला अमेरिकी सैन्य अधिकृत ली टियान विरुद्ध घुसखोरी र सरकारी सम्पत्ति चोरीको षड्यन्त्र सम्बन्धी अभियोग दर्ता गरेको थियो। त्यसको भोलिपल्ट, ६ मार्च २०२५ मा एफबीआईले दुआनलाई ओरेगनबाट गिरफ्तार गरेको थियो।
यस अभियोगमा दुआनलाई अधिकतम १० वर्षको जेल सजाय, २,५०,००० अमेरिकी डलर जरिवाना र ३ वर्षको सुपरिवेक्षित रिहाइ हुन सक्छ। उनलाई १० डिसेम्बर २०२६ मा अमेरिकी जिल्ला न्यायाधीश करिन इमर्गुटको इजलासबाट सजाय सुनाइनेछ।