अमेरिकामा भाडा तिर्न नसक्ने भाडावाललाई डिसेम्बर ३१ सम्म घरबाट निकाल्न नपाइने
प्रकाशित मिति : भाद्र १६, २०७७ मंगलबार
अब अमेरिकामा भाडा तिर्न नसक्ने भाडावाललाई घरवेटीहरुले डिसेम्बर ३१ सम्म घरबाट निकाल्न नपाउने भएका छन् । ट्रम्प प्रशासनले एक निर्देशन जारी गर्दै कोरोनाको फैलावट रोक्नका लागि निश्चित भाडावाललाई घरबाट निष्काशन गर्न डिसेम्बर अन्त्यसम्म रोक लगाएको छ ।
स्थानीय, राज्य र संघीय सरकारले कोरोना महामारीमा घरबाट निष्काशनमा रोक लगाउने नियम स्वीकृत गरेका थिए । ट्रम्प प्रशासनको नयाँ आदेश गत अगस्तमा ट्रम्पले जारी गरेको कार्यकारी आदेशसँग सम्बन्धित छ ।
भाडा तिर्न नसक्नेहरुलाई घरबाट निष्काशन गर्नमा सीडीसीले रोक लगाएको हो । तर त्यसका लागि भाडावालको आम्दानीको गाइडलाइन तय गरिएको छ ।
कार्यकारी आदेशले १ लाख ९८ हजार भन्दा कम आम्दानी भएका दम्पत्ति र ९९ हजारभन्दा कम आम्दानी हुने एकल व्यक्तिलाई समेटेको छ । अर्थात् उक्त आम्दानीभन्दा कम हुनेहरुलाई भाडा नरितेका कारण घरवेटीहरुले डिसेम्बरको अन्त्यसम्ममा निष्काशन गर्न पाउने छैनन् ।
साथै उनीहरुले भाडाका लागि सरकारको सहायता खोजेको समेत प्रमाणित गर्न सक्नुपर्नेछ । त्यस्तै कोरोनाको महामारीका कारण भाडा तिर्न नसकेको कुरा औपचारिक रुपमा घोषणा गर्नुपर्छ । साथै उनीहरु घरबाट निकालिएको खण्डमा होमलेस हुने कुरा प्रमाणित गर्न सक्नुपर्छ ।
यदि भाडावाल र घरवेटीबीच विवाद भएको खण्डमा स्थानीय अदालतले त्यसको समाधान गर्नेछन् । अब कोरोना महामारीका कारण भाडा तिर्न संघर्ष गरिरहेकाहरुले अब चिन्ता गर्नु नपर्ने ह्वाइट हाउसका कार्यकारी प्रेस सेक्रेटरीले बताउका छन् ।