साप्ताहिक ३ सय : ६ राज्यमा पठाउन सुरु, क्यालिफोर्नियामा सेप्टेम्बर ७ देखि, अरु राज्यमा कहिले ?
प्रकाशित मिति : भाद्र १३, २०७७ शनिबार
क्यालिफोर्नियाले संघीय सरकारबाट काम गुमाएकालाई प्राप्त हुने अतिरिक्त ३ सय सेप्टेम्बर ७ बाट दिने भएको छ । संघीय आपतकालिन व्यवस्थापन एजेन्सीको स्वीकृतिपछि क्यालिफोर्नियाले रकम वितरणको तयारी गरेको हो ।
क्यालिफोर्नियाले कुल ४४ बिलियन संघीय बजेटको साढे ४ बिलियन पाउने भएको छ । सेप्टेम्बर ७ बाट रकम पठाउन सुरु गरेपनि अगस्त १ देखिकै साताबाट लागु हुनेगरी रकम पठाइने जनाइएको छ ।
कम्तीमा साप्ताहिक १ सय डलरका लागि योग्य हुने बेरोजगार वा पार्ट टाइम काम गरिरहेकालाई यो रकम पठाइने भएको छ । यो रकम कम्तीमा तीन साताका लागि उपलब्ध हुने भएको छ । थप साताका लागि रकम प्राप्त हुने नहुने कुराको निर्धारण बाँकी रहने बजेटका आधारमा हुनेछ ।
अहिलेसम्म काम गुमाएकाहरुलाई अतिरिक्त साप्ताहिक ३ सय डलर उपलब्ध गराउनका लागि ३५ राज्यहरुले स्वीकृति पाइसकेका छन् । जसमध्ये न्युयोर्क पनि एउटा हो । अहिलेसम्म टेक्सास र एरिजोना लगायत ६ वटा राज्यलेमात्र रकम पठाउन सुरु गरिसकेका छन् । अन्य राज्यहरुमा लुजियाना, मिजौरी, मोन्टाना र टेनेसी रहेका छन् ।
अधिकांश राज्यहरुले मध्य सेप्टेम्बर वा सेप्टेम्बरको अन्त्यसम्ममा रकम पठाउन सुरु गर्ने न्युयोर्क टाइम्सले जनाएको थियो । तर कतिपय राज्यले सेप्टेम्बरको पहिलोसाता पनि पठाउन सुरु गर्ने अनुमान गरिएको छ ।
काम गुमाएकाहरुलाई अतिरिक्त साप्ताहिक ६ सय डलर दिनेमा अहिलेसम्म डेमोक्र्याट्स र रिपब्लिकनहरुबीच सहमति कायम भएको छैन । राहत प्याकेज २ दशमलव २ ट्रिलियन डलरको बनाउनेमा सहमत नभएसम्म ह्वाइटहाउससँग वार्ता अगाडि नबढ्ने हाउस स्पीकर न्यान्सी पेलोसीले अडान लिएकी छन् ।