न्युयोर्क राज्यमा लगातार १५ दिनदेखि संक्रमणदर न्यून, न्युयोर्क सिटीमा मृत्युदर शुन्यप्राय
प्रकाशित मिति : भाद्र ६, २०७७ शनिबार
क्वीन्सबोरो ब्रिजबाट देखिएको क्वीन्सतर्फको दृश्य । फोटो : खसोखास
न्युयोर्क राज्यमा लगातार १५ दिनदेखि कोरोनाको संक्रमणदर न्यून रहेको छ । त्यस्तै कोरोनाको संक्रमणबाट अस्पतालमा भर्ना हुने दर र आईसीयुमा भर्ना हुने दरमा पनि कमी आएको छ ।
न्युयोर्क राज्यमा संक्रमणदर अहिलेसम्मकै कम शुन्य दशमलव ६९ प्रतिशतमा झरेको । विगत १५ दिनदेखि न्युयोर्क राज्यमा संक्रमणदर एकप्रतिशत भन्दा कमी आएको गभर्नर एन्ड्रयु कुमोले शनिबार बताएका छन् ।
शुक्रबार न्युयोर्कमा ९४ हजार ८ सय ४९ को परीक्षण गरिएकोमा ६ सय ५३ जनामा संक्रमण पुष्टी भएको थियो । शुक्रबार न्युयोर्क राज्यमा कोरोना संक्रमणबाट ४ जनाको मृत्यु भएको छ ।
मार्च १६ यता अस्पतालमा भर्ना हुनेहरुको संख्या मार्च १६ यताकै सबैभन्दा कम ४८३ मा झरेको छ । ११६ जना आईसीयुमा रहेका छन्, जुन मार्च १५ यताकै सबैभन्दा कम हो । ५६ जनालाई भने अहिलेपनि भेन्टिलेटरमा राखिएको छ ।
न्युयोर्क सिटीमा पनि संक्रमणदर निकै घटेको छ । सिटीमा संक्रमणदर शुन्य दशमलव २४ प्रतिशत रहेको छ । बिहिबार र शुक्रबार न्युयोर्क सिटीमा मृत्यु हुनेको संख्या शुन्य रिपोर्ट गरिएको छ ।
बुधबार भने एकजनाको मृत्यु भएको थियो । मंगलबार न्युयोर्क सिटीमा २ जनाको मृत्यु भएको थियो ।
न्युयोर्क सिटीमा अहिलेपनि रेष्टुरेण्ट, बार र क्याफेहरुमा भित्र खानको लागि अनुमति छैन । कतिपय रेष्टुरेण्टहरुले बाहिर खानाखाने स्थल बनाएका छन् ।
क्याफेहरुले भने टेकआउट सेवामात्र संचालन गरिरहेका छन् । रेष्टुरेण्टले आउटडोर संचालन गरेका खानाखाने स्थलमा भींडभाड बढ्न थालेको छ । सामाजिक दुरी कायम गरेर टेकआउट सेवामात्र संचालन गरिएका क्याफेहरुमा खास भींडभाड देखिदैन ।