न्युयोर्कमा बेरोजगारी विमामा जालसाजी गर्नेहरु ४२ हजार बढी, संघीय अभियोजनकर्तालाई रिफर
प्रकाशित मिति : श्रावण ३२, २०७७ आईतबार
कोरोनाको महामारीपछि न्युयोर्कमा बेरोजगारी विमामा जालसाजी गर्नेहरुको संख्या समेत ह्वात्तै बढेको न्युयोर्क डिपार्टमेन्ट अफ लेवरले जनाएको छ । न्युयोर्क राज्यको डिपार्टमेन्ट अफ लेवरका अनुशार अहिलेसम्म बेरोजगारी विमामा झण्डै ४२ हजार जालसाजीको पहिचान गरिएको छ ।
१ बिलियन डलरभन्दा बढी रकमका लागि जालसाजी भएको र जालसाजीका कैयन केसहरु संघीय अभियोजनकर्ताहरुलाई पठाइएको जनाइएको छ । संघीय अभियोजनकर्ताहरुले थप अनुसन्धानपछि जालसाजीयुक्त आवेदककाबिरुद्धमा केसहरु तयार गर्ने जनाइएको छ । विगत १० बर्षको इतिहासमा नै सबैभन्दा धेरै जालसाजीका केसहरु संघीय अभियोजन कर्ताहरुलाई रिफर गरिएको विगत ५ महिनाको अवधिमा हो ।
परिचयको चोरी, काम गरिरहेकाहरुका बेरोजगारी विमाका आवेदन लगायतका कैयन जालसाजीका घटना भएको जनाइएको छ । कैयन आवेदनमा डिपार्टमेन्ट अफ लेवरले रकम प्रदान गर्न बन्द गरेको छ भने थप अनुसन्धान अगाडि बढाइसकेको छ । अनुसन्धानका क्रममा कतिपय वास्तविक आवेदनमा समेत रकम पठाउनमा ढिलाई भएको छ ।
त्यस्तै ओहायोमा पनि त्यस्तै जालजासीका आवेदनहरु ठूलो संख्यामा परेको जनाइएको छ । त्यहाँ २ लाख ७० हजारभन्दा बढी जालसाजीयुक्त आवेदनहरु परेको रिपोर्टमा जनाइएको छ । परिणामस्वरुप जालसाजीयुक्त आवेदकको खातामा साप्ताहिक २ सय मिलियन डलर जाने अवस्था बनेको थियो ।
कोरोनाको महामारीपछि अमेरिकाभर ३० मिलियन भन्दा धेरैले काम गुमाएपछि बेरोजागरी विमा वा महामारी बेरोजगारी सहायताका लागि आवेदन दिने अवस्था आएको थियो । ठगहरुले महामारी बेरोजगारी सहायताको प्रणालीको दुरुपयोग गरेर जालसाजी गरेको जनाइएको छ ।