उपराष्ट्रपति उम्मेदवार कमला ह्यारिसको जन्मस्थानबारे विवाद श्रृजना गर्न खोज्दै ट्रम्प
प्रकाशित मिति : श्रावण २९, २०७७ बिहीबार
अमेरिकाका वर्तमान राष्ट्रपति तथा आगामी चुनावका उम्मेदवार डोनाल्ड ट्रम्पले डेमोक्रेटिक उपराष्ट्रपति उम्मेदवार कमला ह्यारिसको जन्मस्थानबारे विवाद श्रृजना गर्न खोजेका छन् । बिहिबार पत्रकारहरुसँग कुरा गर्दै उनले उपराष्ट्रपति उम्मेदवार हुनका लागि कमला ह्यारिसले मापदण्ड पूरा गर्न नसक्ने आफूले सुनेको बताए ।
उनको ह्यारिसको जन्मस्थानबारे प्रश्नचिन्ह खडा गर्न खोजेका थिए । यसअगाडि उनले अमेरिकाका पूर्व राष्ट्रपति बराक ओबामाको जन्मस्थानबारे पनि विवाद श्रृजना गर्न खोजेका थिए । तर उनको प्रयास असफल भएको थियो ।
कमला ह्यारिस क्यालिफोर्नियाको ओकल्याण्डमा सन् १९६४ को अक्टोबर २० मा जन्मिएकी हुन् । उनका बुबा जमैकाबाट अमेरिका आएका थिए भने आमा भारतबाट अमेरिका आएकी थिइन् । कमला ह्यारिस जन्मसिद्ध अमेरिकी नागरिक भएकाले उनलाई उपराष्ट्रपति बन्नका लागि कुनै अडचन छैन ।
अमेरिकाको राष्ट्रपति वा उपराष्ट्रपति हुनका लागि अमेरिकामा नै जन्मेको अमेरिकी नागरिक हुनुपर्छ । अंगीकृत नागरिकता प्राप्त गरेको व्यक्ति अमेरिकाको राष्ट्रपति वा उपराष्ट्रपति हुन पाउँदैन । यो प्रावधान विदेशी प्रभावबाट मुलुकलाई बचाउने उद्देश्यले राखिदै आएको हो ।
कमला ह्यारिसकी आमा श्यामला गोपालन क्यान्सर शोधकर्ता थिइन् भने बुबा डोनाल्ड ह्यारिस अर्थशास्त्री थिए । आमा श्यामलाले नै कमला नाम छनौट गरेकी थिइन् । हिन्दु देवी लक्ष्मीको अर्को नाम पनि कमला हो ।
जब कमला ७ बर्षकी थिइन्, उनका बुबाआमाबीच पारपाचुके भयो । आमाले कमला र माया दिदीबहिनीलाई एक्लै हुर्काउनुपरेको थियो । अश्वेत र साउथ एसियन पहिचानका साथ कमला बाल्यकालमा हिन्दु मन्दिर र चर्च दुबैमा गइन् ।
कमला आफ्नी मावलकी हजुरआमाबाट निकै प्रभावित थिइन् । उनी बाल्यकालमा भारत पनि गएकी थिइन् । उनकी हजुरआमा भारतीय स्वतन्त्रता संग्राममा भाग लिएकी एक उच्च तहकी सरकारी कर्मचारी थिइन् ।