डेढ बिलियन डलरमा मोडेर्नाको भ्याक्सिनका एकसयमिलियन डोज किन्न अमेरिका सहमत
प्रकाशित मिति : श्रावण २८, २०७७ बुधबार
अमेरिकी सरकारले परीक्षणका क्रममा रहेको मोडेर्नाको भ्याक्सिनको १ सय मिलियन डोज किन्न डेढ बिलियन डलर तिर्ने सहमति जनाएको मंगलबार डिपार्टमेन्ट अफ हेल्थ एण्ड ह्युमन सर्भिसले स्पष्ट पारेको छ । अमेरिकन कम्पनी मोडेर्नाले अहिले भ्याक्सिनको बृहत क्लीनिकल परीक्षण गरिरहेको छ, जसको नजिता छिटोमा अक्टोबरसम्म आउने अपेक्षा गरिएको छ ।
क्लीनिकल परीक्षण चलिरहेकै बेलामा मोडेर्नाले अमेरिकाका लागि १ सय मिलियन डोज भ्याक्सिन उत्पादन गर्नेछ । यदि भ्याक्सिन सफल भएमा उक्त डोजहरु आमरुपमा लगाउनका लागि उपलब्ध हुनेछन् । अमेरिकाले विभिन्न कम्पनीहरुसँग भ्याक्सिनका डोजहरु बुक गरिरहेको छ ।
अमेरिकाले भ्याक्सिनको परीक्षण गरिरहेको सानोफीलाई २ दशमलव १ बिलियनडलर, फाइजरलाई १ दशमलव ९५ बिलियन, जोन्सन एण्ड जोन्सनका लागि १ बिलियन डलर भ्याक्सिनका डोजहरुबापत दिन तयार रहेको छ । अमेरिकामा राष्ट्रपति डोनाल्ड ट्रम्पले चुनाव अगाडि नै भ्याक्सिन आउने अपेक्षा गरेपनि आमरुपमा भ्याक्सिन उपलब्ध हुन कम्तीमा डिसेम्बरसम्म लाग्ने देखिएको छ ।
मोडेर्नासँगको सहमतिपछि अमेरिकाले थप ४ सय मिलियन भ्याक्सिनका डोजहरु समेत लिनसक्नेछ । अमेरिकन कम्पनीहरु मोडेर्ना र फाइजरले उत्पादन गरेका भ्याक्सिनहरु जुलाईको अन्तिम सातादेखि बृहत क्लीनिकल परीक्षणमा रहेका छन् । जस अन्तरगत तीसतीस हजारलाई भ्याक्सीन दिइएको छ ।
यसैबीच रसियाले तेश्रो चरणको क्लीनिकल परीक्षणविना नै भ्याक्सिन स्वीकृति गरेको जनाएको छ । तर उक्त भ्याक्सिन विश्व स्वास्थ्य संगठनले समेत सुचिकृत गरेको छैन ।