राहत प्याकेजबारेको वार्ता निष्कर्षविहिन, ट्रम्पलाई कार्यकारी आदेश जारी गर्न सुझाव
प्रकाशित मिति : श्रावण २३, २०७७ शुक्रबार
डेमोक्रेटिक सांसदहरु र ह्वाइटहाउसका वार्ताकारबीच कोरोनाभाइरस राहत प्याकेजबारेको आजको वार्ता निष्कर्षविहिन भएको छ । ट्रेजरी सेक्रेटरी स्टेभन मन्चिन र चिफ अफ स्टाफ मार्क मेडोजसँग आज हाउस स्पीकर न्यान्सी पेलोसी र सिनेटमा डेमोक्रेटिक नेता चक शुमरले भेटवार्ता गरेका थिए ।
आजको भेटवार्ताबाट कुनै सहमति कायम हुन नसकेको मन्चिनले जानकारी दिएका छन् । आजको छलफलमा कुनै प्रगति नभएकाले राष्ट्रपति डोनाल्ड ट्रम्पलाई कार्यकारी आदेश जारी गर्न मन्चिनले सुझाव दिएका छन् ।
भाडा तिर्न नसकेकाहरुलाई निकाला हुनबाट रोक्न र काम गुमाएकाहरुलाई बेरोजगारी सहायता रकम बहाल गर्न कार्यकारी आदेशको आवश्यकता भएको मन्चिनले बताएका छन् । विगतको राहत प्याकेजमा एक्सपायर भएका केही प्रावधानलाई पुन लागु गराउन कार्यकारी आदेशको आवश्यकता परेको उनको भनाई छ ।
आजको भेटवार्तामा ट्रेजरी सेक्रेटरी स्टेभन मन्चिन र चिफ अफ स्टाफ मार्क मेडोजले राहत प्याकेजको रकम बढाउन पेलोसीले गरेको प्रस्ताव अस्वीकार गरेका थिए । चक शुमरले आजको बैठक निराशाजनक भएको बताएका छन् । जब उनीहरु राहतको रकम बढाउन तयार हुन्छन्, अनिमात्र वार्ताका लागि आउन सुझाव दिएको पेलोसीले बताएकी छिन् ।
अब अर्को छलफल कहिले हुने भन्ने केही निश्चित छैन । डेमोक्रेटिक सांसदहरु साढे ३ ट्रिलियनको राहत प्याकेजका पक्षमा छन् भने ह्वाइटहाउस र रिपब्लिकनहरु १ ट्रिलियनसम्मको राहत प्याकेजका पक्षमा छन् । ह्वाइट हाउस सहमत भएमा काम गुमाएकालाई साप्ताहिक ६ सय दिने प्रस्तावलाई पनि समर्थन गर्ने रिपब्लिकन सांसदहरुले बताएका छन् ।