अपडेट : बेइरुतमा भएको विस्फोटमा मृतकको संख्या ७८ नाघ्यो, २५ सय बढी घाइते
प्रकाशित मिति : श्रावण २०, २०७७ मंगलबार
लेबननको राजधानी बेइरुतमा सन् २००५ मा भएको पूर्व प्रधानमन्त्री रफिक हरिरिको हत्याको मुद्दामा फैसला आउनु केही समय अगाडि भएको विस्फोटमा मृतकको संख्या ७८ नाघेको छ । स्वास्थ्यमन्त्री हमद हसनले ५० जनाभन्दा बढीको मृत्यु भएको र मृतकको संख्या अझ बढ्नसक्ने बताएका छन् ।
विष्फोटमा २५ सय भन्दा धेरै घाइते भएका छन् । बिष्फोटपछि सयौंलाई अस्पताल भर्ना गरिएको छ ।
सो विस्फोटन शहरको बन्दरगाह क्षेत्रमा भएको थियो। समाचारहरूमा दोस्रो विस्फोटन पनि भएको जनाइएको छ। अनलाइनमा राखिएका भिडियोहरुमा विशाल धूवाँको मुस्लो र धेरै क्षति भएको देखिएको थियो ।
राष्ट्रसङ्घीय न्यायाधीकरणले हरिरिको कार बम हमलामा भएको हत्याको घटनाका चार संदिग्धको सुनुवाइपश्चात् फैसला सुनाउन लागेको थियो। ती चारै व्यक्ति इरान समर्थित हेज्बोल्लाह समूहका सदस्य थिए। सो समूहले उक्त हत्यामा आफू जिम्मेवार नभएको बताउँदै आएको छ।
स्थानीय समाचारसंस्थाले मानिसहरू भग्नावशेषमा च्यापिएको देखाएका छन्। विस्फोटको कारण प्रस्ट भएको छैन।
हालैका दिनमा लेबननमा सरकारले सन् १९७५ देखि १९९० सम्मको गृहयुद्धयताको सबभन्दा खराब आर्थिक सङ्कटको राम्रो व्यवस्थापन गर्न नसकेको भन्दै सडक प्रदर्शन भएका थिए।