सेप्टेम्बर १५ सम्म अमेरिकन कम्पनीले नकिने टिकटकमा प्रतिबन्ध लगाइने : ट्रम्प
प्रकाशित मिति : श्रावण १९, २०७७ सोमबार
आगामी सेप्टेम्बर १५ सम्म अमेरिकन कम्पनीले नकिनेको खण्डमा टिकटकमाथि प्रतिबन्ध लगाउने अमेरिकी राष्ट्रपति डोनाल्ड ट्रम्पले बताएका छन् । गत शनिबार टिकटकमाथि प्रतिबन्ध लगाउने ट्रम्पले तयारी गरिरहँदा माइक्रोसफ्टले टिकटक किन्ने तयारी सुरुगरेपछि ट्रम्पले प्रतिबन्धको योजना स्थगित गरेका हुन् ।
माइक्रोसफ्टले टिकटकको कुनै भाग भन्दा पनि सम्पूर्ण रुपमा नै खरिद गर्नु उचित हुने ट्रम्पको भनाई छ । सम्झौताको अंशका रुपमा माइक्रोसफ्टले अमेरिकन सरकारलाई उचित रकम तिर्नुपर्ने ट्रम्पले बताएका छन् । माइक्रोसफ्टले अमेरिका, क्यानडा, अष्ट्रेलिया र न्युजील्याण्डमामात्र टिकटक किन्न चाहेकोमा ट्रम्पले ३० प्रतिशतमात्र नकिनेर सबै टिकटक किन्न सुझाव दिएका हुन् ।
टिकटक किन्न तिरिएको रकमको अंश अमेरिकी सरकारलाई पनि आउनुपर्ने ट्रम्पले बताएका छन् । सरकारको कारण अमेरिकन कम्पनीले टिकटक किन्ने सम्झौता सम्भव हुने भएकाले केही रकम सरकारलाई पनि तिर्नुपर्ने ट्रम्पको भनाई छ ।
माइक्रोसफ्टले अहिलेसम्म सबैभन्दा ठूलो सामाजिक सञ्जालका रुपमा लिंक्डइन किनेको थियो, जसको मूल्य २७ बिलियन रहेको थियो । तर टिकटकको मूल्य झण्डै ५० बिलियन रहेको जनाइएको छ । टिकटक अमेरिकन कम्पनीलाई नबेचेको खण्डमा सेप्टेम्बर १५ पछि प्रतिबन्ध लगाइने ट्रम्पले स्पष्ट पारेका छन् ।
टिकटकमा रहेका अमेरिकनका तथ्यांकहरु चीनको सरकारले कब्जा गर्नसक्ने भन्दै अमेरिकाले टिकटकमाथि प्रतिबन्ध लगाउन खोजेको हो । तर टिकटकले भने अमेरिकन प्रयोगकर्ताका तथ्यांकहरु अमेरिकामा नै स्टोर गरिएको बताउँदै आएको छ ।
अमेरिकामा टिकटकका झण्डै १० प्रतिशत प्रयोगकर्ताहरु रहेको बताइएको छ । टिकटकको कुल आम्दानीको झण्डै २० प्रतिशत अमेरिकाबाट हुने गरेको छ ।