काममा बोलाउँदा पनि नजाने कामदार बेरोजगारी विमा रकमका लागि योग्य नहुने
प्रकाशित मिति : जेष्ठ ६, २०७७ मंगलबार
रोजगारदाताले काममा बोलाउँदा पनि नजाने कामदार संघीय बेरोजगारी विमा रकमका लागि योग्य नहुने युएस ट्रेजरी सेक्रेटरी स्टेभन मन्चिनले बताएका छन् । यदि कोही कामदार कोरोनाको महामारीका कारण वेतलवी विदामा बसेको छ वा कार्यस्थल बन्द भएका कारण काममा जान सकेको छैन तर अहिले कार्यस्थल खुलेर रोजगारदाताले काममा बोलाएको छ भने त्यस्ता कामदार काममा जानुपर्ने उनले बताएका छन् ।
पेचेक प्रोटेक्सन प्रोग्राम अन्तरगत रकम प्राप्त गरेका कम्पनीहरुले कोरोनाको महामारीका कारण विदामा बसेका कामदारलाई काममा बोलाउँदा त्यस्ता कामदारहरु काममा नआएको खण्डमा राज्यको बेरोजगारी कार्यालयमा खबर गर्नुपर्ने मन्चिनको भनाई छ । यदि कामदारले काममा आउन अस्वीकार गरेमा त्यस्तो व्यक्ति विस्तृत वेरोजगारी सुविधाका लागि अयोग्य उनले उनले बताए ।
अमेरिकामा कैयनले काम गर्दाको बखतमा भन्दा बेरोजगारी विमाबाट बढी रकम प्राप्त हुन थालेपछि बेरोजगारी दर उच्च हुने रिपब्लिकन सांसदहरुको चेतावनी लगत्तै मन्चिनको भनाई आएको हो । संघीय केयर एक्टले २५० बिलियन डलर विस्तृत बेरोजगारी विमाका लागि छुट्याएको छ, जसअन्तरगत सामान्य २६ हप्ताको तुलनामा ३९ हप्तासम्म रकम पाउनसक्ने व्यवस्था गरिएको छ । त्यस्तै जुलाई ३१ सम्म साप्ताहिक रुपमा अतिरिक्त ६ सय डलर पाउने समेत व्यवस्था छ ।
यसैबीच डिपार्टमेन्ट अफ लेवरका ईन्सपेक्टर जनरलले पीयुएका लागि आवेदन दिंदा जालजासी हुनसक्ने भन्दै सम्बन्धित निकायहरुलाई सचेत समेत गराएका छन् । उनले जालसाजी पत्ता लगाउन र रोक्नसमेत सम्बन्धित निकायलाई निश्चित संयन्त्रको निर्माण गर्न भनेका छन् ।